Shillong, Rymphang 12: U Conrad K. Sangma, President rangbah ka National People’s Party (NPP), mynta ka sngi, u la leit ban pdiang sngewbha ia u Daneil Langthasa, uba dei uwei na ki riew sain pyrthei ba la paw ha Dima Hasao District jong ka jylla Assam.
Ia ka jingialang ban pdiang sngewbha ia u Daneil Langthasa, la pynlong ha Madan Dishru, Maibang, ha kaba nalor ka jingdon u Conrad K. Sangma, la sakhi ruh da ka jingdon kiwei ki heh nongialam ka NPP, kiba kynthup ia u James K. Sangma, National Working President, u Hemochandra Singh, National Vice President lem bad kiwei ki heh ka NPP na ki jylla kiba don shatei lam mihngi.
Ha katei ka sngi ba u Daneil Langthasa, u la rung sha ka NPP, u la ialam ruh da ki hajar ngut kiba dei ki nongbud jong u, ha kaba ka jingpyniasoh jong u sha ka NPP, ka long ban nangkyntiew shuh shuh ia ka Party ha katei ka thain bad khamtam eh na bynta ka roi ka par ha ki shnong ki thaw kiba hap ha Dima Hasao District jong ka jylla Assam.
Haba kren ha katei ka sngi, u Conrad K. Sangma, kum u President rangbah ka NPP, u la pynpaw ba u pdiang sngewbha ia u Daniel Langthasa lem bad ki nongkyrshan ki jong u, kiba la shim ia ka rai ban rung ne pyniasoh noh sha ka NPP.
Shuh shuh, u Conrad K. Sangma, u la ong ruh ba katei ka jingpyniasoh u Daniel Langthasa kum uwei na jaid bynriew riewlum, kan long ruh kum kawei na ki thong ka NPP kaba kwah ban wan rah ia ka jingiaieid iajan ne ban ia long kawei hapdeng baroh ki jylla kiba don ha ka thain shathei lam mihngi, kata na bynta ban pynneh pynsah ia ka jinglong tynrai ki jaid bynriew riewlum bad ka riti ka dustur.
