Nongpoh, Rymphang 12: U Myntri sorkar ka jylla ba dei peit ia ka tnad C&RD bad kiwei ki tnad sorkar u Bah Sosthenes Sohtun mynta ka sngi la leit ban shim bynta kum u kongsan ban pynkup burom ia ki samla ba la pyndep ia ka Music Class kaba de ka 1st Convocation ka Ri Bhoi Presbyterian Music Institute kaba la long mynta ha ka Hall jong ka Ri Bhoi Presbyterian Synod kaba don ha Nongpoh.
Ha kane ka jingleit pynkup burom ia kitei ki samla bad kynthup ruh ki Heprit la shim bynta lang da u MLA ka Nongpoh u Bah Mayral Born Syiem kum u symbut kongsan bad u Nominated MDC ka KHADC u Bah Mathew Makdoh kum u Special gust.
Kiwei kiwei kiba la don lang ha kane ka sngi ki kynthup ia u Rev. K.S Marsing, uba dei u Moderator ka Ri Bhoi Synod, u Rev. L.S Nongphlang, u Rev. B.R Pamshong, u Rev. M.S shadap kum ki pastor ba la shongthaid bad kynthup kiwei kiwei ki pastor bad ki tymmenbasan ka Balang Presbyterian jong ka Ri Bhoi Synod.
Kane ka jingpynkup burom ia ki samla bad ki heprit ki kynthup ia kito kiba la pyndep ia ka Tonic Solfa diploma, Staff Music Theary, Khasi Traditional Music diploma, ka Children’s Vocal training class bad kynthup ia ka Lay leadership Course ba la pynlong da ka Music Ministry ka Ri Bhoi Presbyterian Synod lyngba ka Music Institute kaba don ha Nongpoh.
Ha kane ka sngi naduh u kongsa u Bah Sosthenes Sohtun, u Bah Mayral Born Syiem bad u Bah Mathew Makdoh ki la shim ia ka bynta ban sam ia ki synod sha kitei ki samla bad ki heprit kiba la pyndep ia kitei ki course bapher bapher ba la pynlong ha katei ka Music Institute ka Ri Bhoi Presbyterian Synod.
Ha kane ka sngi, na ka liang ka Ri Bhoi Presbyterian Synod ka la aiti ruh ia ka dorkhas sha u Myntri sorkar u Bah Sosthenes Sohtun ban thaw lad thaw lynti ruh na ka bynta ban pynbha ia katei ka Hall, ki kynroh jong ka Ri Bhoi Presbyterian Synod, ki tiar put ki tiar tem bad kiwei kiwei ki jingdonkam ha kaba pyniaid ia katei ka Music institute ka Ri Bhoi Presbyterian Synod.
La ai jingkren ruh ha kane ka sngi da u Bah Sosthenes Sohtun, uba long u kongsan jong kane ka sngi, ha kaba u la ai khublei kyrpangia ka Ri Bhoi Presbyterian Synod kaba la don ia ka thong ban buh ia kane ka Music Institute ban ai rynsan ia ki samla don sap ha ka put ka tem bad ka rwai ka siang bad nalor kata ka ai ai jinghikai ruh ia ki samla ban long kita ki nongialam lyngba ka Lay Leadership Course ba kum ka imlang ka sahlang ka donkam ia kita ki nongialam kiba ioh ia ka jinghikai kaba pura ban sain dur ia ka imlang ka sahlang.
U la ong ruh ba ka ka put ka tem bad ka rwai ka siang ka dei kawei na kaba ai jingkmen ia ki nongsngap bad kita ki jingput jingtem ne ka rwai ka siaw ka dei pat ban long kaba ai jingmyntoi bad ym ban long kita ki jingrwai kiba ktah pynban ia ka imlang ka sahlang.
Shuh shuh, ha kane ka sngi, u la kular ruh ban shim khia lem halor ka dorkhas ba la aiti da ka Ri Bhoi Presbyterian Synod lyngba ki lad jingiarap na ka sorkar, kaba dei na ka bynta ban pynbit pynbiang ia katei ka Music Institute bad kiwei kiwei ki jingdonkam kumba la pynsngew ha kane ka sngi ha ka dorkhas da ka Ri Bhoi Presbyterian Synod.
