Nongpoh, Rymphang 12: Ki pulit ka Nongpoh mynta ka sngi ki la lap ia kawei ka met iap u rangbah ba la sdien phasi ia lade ha jrong dieng hajan ka trai siej bad ia kane ka la pyntip sha ki bor pulit da ki bor shnong ka shnong Umling kiba la ioh jingtip halor kane jingjia.
Ia ka bor shnong Umling la pyntip da ki ar ngut ki nongthoh dieng, kiba lap ia katei ka met ha ka por ba ki dang leit thohdieng ha ka khlaw Reserved Forest ha Umling bad ha kane ka jinglap ia katei ka met la iohi ba ka met ka la pyud bad la shu sahkut ha utei u tyllai phasi ba ki la pyntip noh mardor sha ka bor shnong Umling kiba la pyntip pat sha ki pulit.
Une u rangbah ba la suba sdien phasi ia lade la tip kyrteng kum u Shyam Limbu, 70 snem ka rta uba shu wan sah bad kiba haing ha Umling bad u dei ruh na ka jaid bynriew Nepali.
Halor kane ka jinglap ia ka met, ki Pulit ka Nongpoh ki la hiar mardor ban tohkit ia katei ka met bad hadien ka jingtohkit ki la aiti noh sha kiba haing ban tep noh ia ka met ba dang sah jong u, kata ruh hadien ba kiba haing kim shym la don kano kano ka jingsuba shah pyniap ba la pynlait noh na ka post mortem examination.
