Ka Rajyalaxmi Chitrakar, kaba dei ka lok u Prime Minister barim ka Nepal u Jhalanath Khanal, ka la khlad noh mynta ka sngi, kaba dei hadien ba ka kynhun ki nongiakhih ki la thang syndon ia ka ïingsah jongka ha Dallu ha ka thain jong ka Kathmandu, kaba dei ka Nongbah jong ka ri Nepal.
Kum ban pynkynmaw, ka jingiakhih ki paidbah ha Nepal ka la sdang ban kyan naduh ka jingkhang ka sorkar Nepal ia kiba bun ki rynsan social media kum ka Facebook, Whattsapp, Youtube bad kiwei kiwei kiba khlem register bad ka sorkar bad dei ha ka sngi Nyngkong mynta ka taiew ba ka jingiakhih ka la nang jur haduh ba la shah thang wat ia ka parliament jong ka Nepal bad kiwei kiwei ki jingtei sorkar kiba la shah thang ha ki nongiakhih kiba pyrshah sorkar.
Kane ka jingiakhih kaba la sdang dang myn ha ka ngi nyngkong ka la pynlong ruh wat ia Prime Minister ka Nepal u KP Sharma Oli ba un hap ban iehkam noh kum u Prime minister, kaba dei na ka jingjur palat ka jingiakhih kaba la ktah ia ka shongsuk shongsain ha ka ri Nepal hi baroh kawei.
Kaba kham sngew shyrkhei na ka jingjia nalor ka jingshah thang ka Parliament ka Nepal, ka jingthang ia ki jingtei sorkar bapher bapher, ka dei ka jingkhlad noh ka lok u Prime Minister barim ka Nepal, kaba la iap na ka jingmynsaw hadien ka jingshah thang ka ïingsah jongka kumba la sa phriang ha kylleng ki tyllong khubor ka pyrthei.
Lyngba kane ka jingiakhih, ka jingiathang ding, ka jingbom ia shoh ka la poi ruh shaduh u pud ba haduh 21 ngut ki mynsiem ki la duh noh ia la ka jingim bad palat 400 tam kiba la mynsaw jur na kane ka jingiakhih, kaba ki la ia khih ban pyrshah sorkar halor ka kam bamsap bad ka jingleh shiliang khmat da ka sorkar ha ki kam ki jam kumba la pynpaw ha katei ka jingiakhih hapoh ka ri Nepal.
