Nongpoh, Nailur 10: Ban iada ia kiba bun ki mynsiem ba kordor kiba thmu ban shim ia la ka jingim bad ban lait na kum kine ki jingjia ba bun ki mynsiem ha ka jingkut lad ki ju pynkut ia la ka jingim da kaba pyniap ia lade, ka ophis jong ka District Medical and Health Officer ka Ri Bhoi mynta ka sngi ka la pynlong ia ka jingrakhe ia ka ‘World Suicide Prevention Day’ na ka bynta ban ia kren halor ki lad jingiada ban pynduna ia kum kine ki jingjia ba sngewsih.
Ia kane ka jingrakhe ia ka World Suicide Prevention Day la sdang da ka jingiaid paidbah ki khynnah skul kaba la sdang na MUDA Shopping Complex bad la pynkut ha Parish Hall Nongpoh, ha kaba la don ka jingiatai halor shibun ki lad jingiada ban pynduna ia kine ki jingjia kiba shim ia ka jingim lade.
La rakhe ruh ia kane ka World Suicide Prevention Day halor ka phang, ‘Changing the narrative on suicide’ with the call to acton.
Lyngba ka jingiathir halor ki lad ban iada na ka jingshim ia ka jingim lade, la don haduh 7 ngut ki nongshim bynta kiba la ai jingkren ban ia thir halor ki lad jingiada ban pynduna ia kane ka jingjia ba shim ia ka jingim lade.
Kitei ki nongshim bynta ki kynthup ia ka Dr. Andrecia Mawiong, Assistant Professor na Shillong Medical College, u Orville Masar, ASP ka Ri Bhoi, u Bah S.B Blah, u ophisar na ka tnad Education, ka Kong Lamjingshai Peter Lyngdoh, Councellor ka DCPO Ri Bho bad ka Kong B. Marai, Assistant Legal Aid Defense Councel ka Ri Bhoi.
