Nongpoh, Jylliew 29: Ka jinglong jingman jong ka jingiaid ki kali ha u surok bah National Highway 06 ka la nang pynshong syier ia kiba bun ki nongleit nongwan, khamtam ha ka sngi Saitjaiñ bad Sngi U Blei, tang namar ka jingpyndonkam bakla da ki kynhun jong ki samla nongñiah thukthuk ne kali ar shaka ban pynlong ia u ne u surok bah kum ka surok ban ia khyllew ia ka rukom niah jong ki da kaba pynher sted bad leh stunt hapdeng u surok bah khlem da pyrkhat shuh ia kiwei pat ki nongleit nongwan ha u ne u surok bah.
Watla, ki bor pulit ka jylla ki la iai treishitom ban peit pyrman ia kum kine ki riew shimkabu ne ki khynnah shit khlieh ki bym don shuh ka mynsiem pyrkhat ialade ne ia kiwei pat da kaba iai ialeh sport ha ka rukom niah ia ki thukthuk jong ki ha u surok bah bad bun ki la shah daiñ kuna hynrei kane kam shem la biang namar ka jingiai bteng ki khynnah shit khlieh ban iai pynlong ia u ne u surok bah National Highway 06 ha Ri Bhoi District kum kata ka Stunt Mania Track ban ia pynher ia ki thukthuk jong ki ban khyllew ba ki long kiba triem ban niah thukthuk.
Kumba la iai sakhi na ka por sha ka por, ba u ne u surok bah National Highway 06 ha Ri Bhoi District, la lum jingtip ba tang ha kine ki khyndiat bnai la don shibun tylli ki jingjia aksiden kali ha kylleng ka district ha u ne u surok bah tang na ka daw ka jingpynher sted ia ki kali, ki thukthuk bad kiwei kiwei ha kaba da ki spah ngut ki la khlad bad bun ngut ki la mynsaw jur kaba long ka khubor kaba ktah shikatdei eh khamtam ia kito ki longiing kiba mad ia kine ki jingjia ba sngewsih.
Katba ka jingiai minot ki pulit ka Ri Bhoi District ban ai jinghikai ban sneng na bynta ban husiar ia ka rukom niah sted ia ki kali, phewse bun kiwei pat ki kheiñ kamkai ia kane, kumba la sakhi biang ha ka 29 tarik Jylliew 2025, da ki spah ngut ki nongñiah thukthuk lem bad ki paralok ki la hiar sha kane ka district ban pynlong ia ki rukom niah stunt jong ki ban pyndonkam ia u surok bah National Highway 06 khamtam ha ki bynta jong ka Umsamlem, Umran, Umsning Bypass bad Sumer.
Dei ha kane ka jingiapyni ia ka jingiakhyllew jong ki nongñiah thukthuk, la don pat ka jingjia accident kali ha Umsning Bypass ha ka shnong Umkaliar, ha kaba ka kynhun jong ki saw ngut ki samla ba dang ha ki rta ba 18-20 snem kiba la wan iaid kai sha kane ka district lyngba ka kali saw shaka jong ki, hynrei namar ka jingpynher sted u nongniah kane ka kali ka la tynrah ia u divider jong u surok bah bad kylla syndon haduh lai ne saw khongpong haduh ba u nongniah u la mynsaw jur lem bad u wei pat katba arngut kiwei ki la phet krad na katei ka jaka.
Na ka liang ki bor pulit ka Umsning Police Station lem bad ka Ambulance jong ka 108 ki la poi marmar ha katei ka jaka ban pynkit ia kiba la mynsaw sha Umsning CHC ban ioh ia ka jingsumar bad ka jingtohkit ka dang iaid shakhmat. Ka jingkylli ka mih ba lano kine ki samla kin sngewthuh ba kim dei ban leh shit khlieh haba niah ia ki kali ne thukthuk ha u surok bah namar da ka jingleh jong ki ka buh jingma ia ki bad ia kiwei pat.
