Nongpoh, Jymmang 31: U Bah Charles Marngar, MLA Mawhati, mynta ka sngi u la lah ban sam tin sop iing sha ki 575 tylli ki longiing na ki shnong bapher bapher kiba hap ha Mawhati Constituency, ha kaba ia katei ka jingsam tin la pynlong ha shnong Nongjri, Ri Bhoi.
Haba batai ia katei ka rukom sam tip sha ki longiing ba duna ka ïoh ka kot, u Bah Charles Marngar, u la ong ba la sam sha kitei ki 575 mar lai ban kawei ka iing bad ha ka shi ban ki don 9 tylli ki tin sop iing, kaba mut ba kitei ki la iohpdiang ki la ïoh haduh 27 tylli ki tin bad kaba la biang pura ia ki ba kin pyndonkam ha ka ban tap ne ker ia ki iing ki sem.
Kitei ki tin ia kaba la ïoh ban sam sha ki paidbah ka Mawhati Constituency, ki dei na ka skim jong u snem 2023-24, ia kaba kum u MLA u la pynioh sha ki paidbah ha ki shnong bapher bapher kiba hap ha Mawhati Constituency.
Shuh shuh, u la ong ruh ba hadien kane, kan sa don biang ka jingsam tin sha kiwei kiwei pat ki jaka bad aiti sha kito kiba donkam shisha ka jingiarap.
