Nongpoh, Jymmang 31: Nalor ba la kynduh mawsiang na ka jingshlei um ha Jorobat, ki paidbah nongshong shnong ka thain Jorobat ba hap ha u pud u sam ka Meghalaya ki la hap ruh ban mad jingeh na ka jingtih khyndew ba ka khyndew ktieh ka la tuid sha surok ba la pynjynjar ia ki paidbah ha ka leit ka wan.
Ha kane ka jingtih khyndew, ka la buh jingma ruh ym tang ia ki paidbah ba leit ba wan bad ka la buh jingma ruh ia kawei ka ïing na ka jingsynjor jong ka khyndew kaba la tih khyndew ha katei ka jaka.
Kane ka jingtih khyndew, ka ktah ruh ym tang ia ki paidabah nongshong shnong bad ka la ktah ruh ia ki Kali kamai paidbah khamtam ki Auto Rickshaw ba ka khyndew ktieh bad jaboh ka la tuid sha ka surok kaba la jynjar ha ka leit ka wan.
Haba ioh pdiang ia ka jingujor halor ka jingshah ktah na kane ka jingtih khyndew, ka seng Federation of Khasi Jaintia and Garoi People, Byrnihat lem bad ka FKJGP 12mer Unit ha ka jingialam u Devose Chyne, Vice President bad u Ricky Marak ki la leit ban ia kynduh ia ki nongshong shnong kiba la pynpaw jingeh.
Ha kane ka jingleit jurip, ka FKJGP ka la khang tala syndon ia ka khyndew ban rung sha katei ka jaka tih khyndew kaba la pynjynjar ia ki paidbah bad ha kawei ka bynta ka dawa ruh ba dei ban siew bai lutksan ia kito ki longing kiba shah ktah.
