Nongpoh, Nailur 30: Ïa ka met kaba sah jong u Pa’iem Hamberly Wahlang, uba dei u Syiem ka Hima Jirang bad uba la khlad noh ha ka 27 tarik mynta u bnai ha North Eastern Indira Gandhi Regional Institute of Health & Medical Sciences (NEIGRIHMS) ha Nongbah Shillong, la pyndep noh mynta ka sngi ha u hapoh ka jaka lajong kaba don ha shnong Wahsynon, Ri Bhoi Sepngi.
Ia ka jinglehniam ba khatduh ia u Pa’iem Hamberly Wahlang, nyngkong la sdang ka jinglehniam ha iingsah jong u, hadien kata la rah ia ka met sha ka Iingmane ka Balang Presbyterian Wahsynon, ba pyndep ia ka jinglehniam kaba khatduh na ka liang ka Balang, hadien kata pat la pynrung khatduh sha ka ophis ka Hima Jirang kum u Syiem jong katei ka Hima.
U (Late) Tbn. R. Hamberly Wahlang la kha ha ka 16 tarik u Rymphang jong u snem 1946 ha shnong Mynnar ha ka jingpule, u la pyndep ia ka Bachelor of Arts (B.A) na Guwahati University.
Ha kaba nyngkong, u la long kum u Nonghikai skul ha Jirang Government Aided High School, ha kaba u la long ruh u Head Master ba shipor ha katei ka skul bad hadien kata u la trei ruh ha Church’s Auxiliary for Social Action (CASA) kum u Community Organiser jong ka state Meghalaya bad hadien kum u Programme Assistance ha ka North East hi baroh kawei.
Haba phai pat halor ka jinglong kum u Syiem ka Hima Jirang, dei ha u snem 2005 kata hadien ka jingkhlad noh u Syiem Lokendro Wahlang, ka Dorbar Hima Jirang ka la pynlong ka jingjied syiem, kumta u la iehnoh ia ka kam ba u trei bad ka CASA bad u la ieng kum u kyrtong ha kaba u la poi sha ka jingjop bad ha ka 2 tarik u Lber jong u snem 2005, ka Khasi HIlls Autonomous District Council (KHADC), ka la pynkupbor ia u ban long u Syiem ba pura jong ka Hima Jirang bad u la long u syiem haduh ka sngi ka jingkhlad jong u.
Haba phai pat kum u Nongsharai Balang, dei ha u snem 2008, u la shah jied kum u Tymmen Basan ka Balang Presbyterian Wahsynon bad la thung (ordain) ia u ha ka 14th February, 2009, ha ka jingtrei jong u kum u Nongsharai, u la long u briew ba shisur shidur, uba kren beit tang ia ka jingshisha bad u long ruh uba ieit ban trei shitrhem ia ka kam U Kynrad hapoh la ka Balang.
Ha ka jingnangnoh ha ki snem ki karta, ka jingpang ka la sdang ban trei ha ka met jong u. U la poi ban shah sumar sha Hospital la katto katne sien. Hynrei watla hapdeng ka jingpyrshang ban sumar pynban ka jingpang jingshitom jong u ka la nangjur. Kumta, dei ha ka 27th September, 2025 ha ka por kumba 7:00 PM U Trai U la wan shaw noh ia u shalade hi ha kaba u la khlad ha NEIGRIM Hospital Shillong.
Mynta ka sngi, kaba dei ka sngi lehburom khatduh ia u Pa’iem Hamberly Wahlang, ki khun ki hajar ka Hima Jirang, ki la tuid sha ka shnong Wahsynon, kaba long kum ka dak ban ai khublei khatduh ia u u Pa’iem Hamberly Wahlang.
