Shillong, Nailur 30: Haba kren sha ki lad pathaikhubor mynta ka janmiet hadien ka jingiakynduhlang ka kynhun myntri sorkar ka jylla ha Nongbah Shillong, u Myntri Rangbah ka sorkar jylla, u Conrad K. Sangma, u la kren shai ba wat ka sorkar jylla ruh ka pyrshah ia ka jingthmu ban tih ia u Uranium hapoh ka jylla.
Katei ka jingkren jong u Conrad K. Sangma, ka dei ruh hadien ba ka sorkar pdeng lyngba ka Ministry ka tnad Environment, ka la phah kot sha ka sorkar jylla bad kaba la bthah ban pynduh pyndam noh ia ka Public Hearing ne ban sngap ia ka sur u paidbah halor ka jingthmu tih Unranium ha ka jylla bad kaba la wanrah ruh ia ka jingpyrshah kaba jur na baroh ki kynhun.
Halor katei ka mat, ka sorkar jylla kan sa pule bniah ia katei ka jingthoh na ka sorkar pdeng bad lada donkam ban iaid shaneng, kaba mut ba ka sorkar jylla kan sa leit iakren sha ki heh ka sorkar pdeng, kiba don ha ki kyrdan bapher bapher, ong u Conrad K. Sangma.
Shuh shuh, u Conrad K. Sangma, u la ong ba kumba ki paidbah ka jylla ki pyrshah jur halor ka jingthmu tih ia u Uranium ha ka jylla, kumta kum ka sorkar kaba sngap ia ka sur u paidbah, ka dei ka kamram ia ka sorkar ban iakren, ia kino kino ki ain ne ki jingpynmih hukum kiba ktah ia ki paidbah ha ka jylla, namar ka sorkar ka kwah na bynta ka bit ka biang jong ki paidbah ha ka jylla hi baroh kawei.
