Khlem da poi pyrkhat kum kine ki jingjia, ha kaba kawei na ka Bus kaba ju kit ia ki nongleit nongwan na India sha Bangladesh lyngba Dhakha-Shillong-Guwahati ka la pynlyngngoh ia kiba bun balang ki nongleit nongwan, namar na kane ka Bus ki ophisar ka tnad Custom ki la ioh ban kurup ia ki kynja tiar ba rem dor ba la kot sha ka T. 48 lak.
Kane ka jingioh kurup ia kitei ki tiar ba rem dor, ka dei ha ka jingkhynrah ka tnat Custom ha Dawki integrated check post/land port, ba la lap ha ki bynta ba shapoh katei ka Bus ba la song bha ia kitei ki tiar ba rem dor.
Kane ka Bus, ha kaba ha ka jinghsisha ka dei ban long kata ka Bus kaba pyniajan ne pyniaieit paralok hapdeng ki Nongshong shnong ka India bad Bangladesh, ka la kylla long pynban kata ka Bus ba kit ia ki mar beain da kaba burieh bha sha ki bynta ba shapoh jong ka Bus. Ki ophisar ka tnad Custom ki la hap ban pyndonkam da ka Welding Machine ban plie ia katei ka kynja synduk hapoh ka Bus ba ki la lap haduh 30 kilograms ki kynja jingdeng rupa, 110 tylli ki mobile phone, 238 ki jain sari Banarasi, kumba 1,000 tylli ki kynja contact lenses bad shibun tylli ki tiar bapher bapher jong ki Mobile.
Na kane ka jingjia, ka la pynlong ruh ka sngewlyngngoh kaba khraw bad la pynlong ruh ia ki ophisar ka tnad Custom ban kem ia ki 3 ngut ki nongtrei katei ka bus ba kynthup ia u Dribar, u Manager bad uwei pat u nongiarap trei ha katei ka Bus. La aiti ruh ia kine sha ka tnad Custom na ka bynta ban pynlong ia ka jingtohkit kaba bniah kiba dei katkum ki lynti jong ka ain.
Na ka liang ki ophisar ka tnad Custom ki la pynpaw ia ka jingbym sngewlah ngeit ha kane ka rukom shalan tuh ia ki tiar lyngba katei ka Bus, la ong ruh ba ki la ioh ju ioh pdiang ia ka khubor shaphang kane ka kam shalan tuh ia ki tiar bad ki poi pyrkhat pat ba ha kane ka bus kin don kum kine ki rukom shalan tuh ia ki tiar beain. Wat la kane ka la pynlyngngoh, ki nongpeit pyrman ki pynlong ia ka jingpeitngor bha bad kaba la pynlong ruh ia ki ban lap ne ioh kuru pia kitei ki tiar. Kane ka Bus ka la poi ha ka por 6.30 baje mynstep ha Shillong ISBT bad ka la poi pat ha ka por 12.30 mynsngi ha Dawki Land Port bad dei lyngba ka jingtalasi jur la lap ia kine ki tiar beain ba la kit lyngba katei ka Bus.
Kumba la pynpaw, kane ka Bus ka la sdang ban ai jingshakri ia ki paidbah nongleit nongwan na India sha Bangladesh ka dei naduh u snem 2014 bad la ju don ruh ka jingsuba ba kane ka Bus ka kit ia ki kynja tiar. Dang shen ruh katkum ka jingai jingtip kaba ym pat da tikna la suba kane ka bus ka kit ruh ia ki ksiar ha kaba kim pat lap ia ki dak ki shin.
Ia kane ka Bus la ioh kurup tiar, ki don 24 ngut ki nongleit nongwan ba la ai ia ka jingiada ba kin poi suk sha Bangladesh da ki Shipai BSF ka Meghalaya Frontier. Kane ka jinglap ne ioh kurup ia ki tiar kan pynlong ruh ba kan don ruh ka jingpahra ne peitngor bha ha ki bynta khappud na Tripura bad West Bengal ban leit sha ka ri Bangladesh.
Shuh shuh, la ong ruh ba kane ka jingioh kurup tiar kan ktah ym tang ka jingiatylli lyngba ka leit ka wan ki paidbah na ki Bus bad kan wan rah ruh ia ka jingdonkam ba hap ban long peitngor ia ki Bus ba iaid na kawei ka ri sha kawei ka ri bad kynthup ruh haduh ki Rel hapdeng ka India bad ka Bangladesh. Ia kine ki surok kan sa don kata ka jingpeitngor kaba jur ban iada na kum kine ki jingkit ia ki tiar beain.
