Shillong, Nailar 6: Ki paidbah ka ri Bangladesh kiba la mih iakhih hynnin ka sngi, ki la thang dusmon ia ka Indira Gandhi Cultural Center kaba don ha ka thain Dhanmondi jongka nongbah Dhaka ha Bangladesh. Katei ka jingleh jong ki riew paidbah, ka la wanrah ia ka jingduhnong kaba khraw ia ki kot ki sla bad ki jingdon jingem kiba don hapoh katei ka jaka bad kynthup ruh ka jingshah pynjulor jong u mot jong u Tirot Sing Syiem.
Kum ban shu pynkynmaw, u Symbud Myntri Rangbah ka jylla, u Bah Sniawbhalang Dhar ryngkat kiwei de ki Myntri sorkar bad heh ophisar ka jylla ha ka 16 tarik jong u bnai Rymphang mynta u snem 2024 ki la leit hiar sha ka nongbah Dhaka ban plie paidbah ia u mot jong u Tirot Sing Syiem, u nongialeh laitluid ka rilum Khasi pyrshah ia ka sorkar phareng hapoh katei Indira Gandhi Cultural Center.
Lyngba kane ka dur khih kaba la ioh lum, la iohi ba kiba bun ki bynta jong kane ka ing kala ingkhong bad ki jingdon jingem kiba lait na ka ding ruh, ki la shah tuh lut ha ki paidbah nongiakhih.
Na ka liang u Myntri Rangbah ka jylla, u Conrad K Sangma, u la pynrem jur ia ka jingleh dusmon bad pynjulor ia u mot jong u Tirot Sing Syiem, bad kyntu ia ki bor ba dei peit ba kin shim ki lad ki lynti ban khanglad ia ka jingkiew jongka jingiakynad.
