Ki bor pulit jong ka jylla nongbah Guwahati ka jylla Assam lyngba ka kynhun kaba kyrpang jong ka East Guwahati Police Department (EGPD) na ka thanad Hatigaon mynta ka sngi, ki la ioh ban kem kumba hynriew ki snar nongtuh kali ar shaka ba kynthup ia lai ngut na ka jylla Meghalaya.
Katkum ka tyllong khubor na ki pulit ka nongbah Guwahati, la iathuh ba ki bor pulit nyngkong ki la ioh ban kem shwa ia lai ngut kiba la tip kyrteng kum u Mohmudul Hussain (29), u Ruhul Amin (27) bad Phulchand Ali (32), baroh kiba dei na Goalpara bad ha ka jingtohkit ia kine ki snar nongtuh kali ar shaka, ki bor pulit ki la ioh ban kem sa lai ngut kiwei pat snar nongtuh kiba dei na ka jylla Meghalaya ia kiba la tip kyrteng kum u Bijay Sangma (24), Tengsrang Sangma (26) bad u Sohidul Islam (34).
Ki bor pulit ka nongbah Guwahati, ki la iathuh ba kane ka kynhun jong kine ki ba la shah kem noh, kidei kiba donkti ban tuh ia ki kali ar shaka na ka jylla Assam bad leit ban pynpoi pat sha ka ri Bangladesh lyngba ki khappud ka ri lum Garo.
