Ban nym shah ktah ki samla pule na ka jylla Meghalaya bad kiwei ki jylla na ka ri India bad kiwei ki ri kiba pule ha ka ri Bangladesh, ka sorkar Meghalaya, ka la shim khia ban pynkynriah noh ia ki 405 ngut ki samla pule ban leit shaw noh ia ki, kaba dei hadien ba la ar sngi ka la don ka jingiakhih bad ka jingklumar kaba jur ha ka ri Bangladesh kaba la ktah ruh ia ka shongsuk shongsai ki paidbah.
Kumba la iathuh da u Myntri rangbah ka jylla, U Conrad K. Sangma, la ong ba na na kitei ki 405 ngut ki samla pule ba la leit shaw da ka sorkar Meghalaya, 80 ngut ki dei na ka jylla Meghalaya, 131 ngut na kiwei ki jylla jong ka ri, 249 ki dei ki samla pule na ka ri Nepal, 8 ngut na Bhutan bad ki don ruh 4 ngut ki nongleitjngohkai pyrthei kiba la iarap ban wan phai noh sha ka jylla bad ka ri kaba ki shong ki sah.
Shuh shuh, u la ong ruh ba ka sorkar Meghalaya ka la shim khia ban iarap ia ki jingdonkam jong kitei ki samla pule bad kiwei kiba la pynkynriah noh na ka ri Bangladesh ba kin wan phai sha ki shnong ki thaw jong ki bad ia kane ka jingpynkynriah ia ki na ri Bangladesh la ia trei lang ruh bad ka Bangladesh High Commission, ka Indian High Commission ha Dhaka bad Chittagong, kaba dei ka bor pyniaid ha Land port Dawki bad ruh ki seng jong ki nongshalan mar shabar ri.
