U Myntri Rangbah ka jylla Assam, u Himanta Biswa Sarma u la kam ba ka jingbun paid jong ki jaidbynriew Muslim ha ka jylla Assam ka kiew kumba 30 percent ha manla ki 10 snem bad ba kin sa long heh paid hapoh ka jylla ha u snem 2041.
Ia katei, u Himanta Biswa Sarma u la pynpaw haba kren sha ki lad pathai khubor ha ka nongbah Guwahati mynta ka sngi ha kaba u la iathuh ruh kumba long mynta, ki jaidbynriew Muslim ki la don haduh kumba 40 percent na ka jingbun paid ha ka jylla Assam katkum ki jingkhein kiba la ioh lum lyngba ka khana samari.
“Ha u snem 2011, ki don haduh 1.4 klur ki jaidbynriew Muslim ha Assam. Ha u snem 2041, ka Assam kan kylla long ka jylla heh paid jong ki Muslim, kane kadei ka jingshisha bad ymdon ba lah ban pynsangeh iaka” la ong u Himanta Biswa Sarma.
Katkum ka khana samari jong u snem 2011, ka jylla Assam ka don haduh 1.07 klur ki jaidbynriew Muslim na ka 3.12 klur jong ka jingbun paid ha ka jylla baroh kawei bad pyntip ruh ba ki don kumba 1.92 klur ki Hindu kiba long 61.7 percent na ka jingbun paid ha baroh ha ka jylla.
U Himanta Biswa Sarma u la ong ruh ba manla ka 10 snem, ka jingbun paid jong ki jaidbynriew Muslim ka kiew kumba 11 lak hapoh ka jylla Assam, da kaba kam ba kane kam dei satia ka khana samari ka jong u shimet, hynrei kaba la pynmih da ka tnad Census jong ka ri, bad kaba la dep ban pynlait paidbah.
U la iathuh ruh ba ka sorkar Assam ka lah dep ban shim ia ki sienjam ban pynduna ia ka jingroi sted jong ka jingbun paid ki jaidbynriew Muslim ha ki lai snam ba la leit, hynrei ki don shibun ki jingeh ban ia khun pyrshah halor kane ka jingkiew sted ki jaid bynriew Muslim ha ka jylla Assam.
U Himanta Biswa Sarma u la ong ruh ba lada u Rahul Gandhi udei u nongrah ktien ban pynduna ia ka jingkharoi jong ki paidbah, kan iarap bad treikam sted bha. “Phim donkam ban shong lok bad kha khun 12 ngut ban long u nongrah ktien. Leit sha ki shnong Muslim bad ar tylli ki kyrteng, Himanta Biswa Sarma lane Rahul Gandhi- baroh kin sa ong ba ki ngeit ia kaei kaba u Rahul Gandhi u kren” la kren siat u Himanta Biswa Sarma ia u Rahul Gandhi ba dei u nongialam ka liang pyrshah ha ka Lok Sabha da kaba kynthoh ruh ba ka seng Congress kadei tang maka kaba lah ban pynduna ia ka jingroi sted jong ki jaidbynriew Muslim.
U la buh jingkylli ruh ia ka Congress da kaba ong, “ Ba ka bynta kaba hakhmat eh ban pynduna ia kane ka jingbun paid ki jaid bynriew Muslim, ka shong ha ka Party Congress, namar dei tang ha ka party Congress ba ki jaid bynriew Muslim kin sngap ia ka”.
“Lada phi shim ba kane ka jingroi sted ki jaid bynriew Muslim ka long tang ban ioh vote bad kum ki nongialam sain hima sima kim dei ban ia snoh kti lang halor ki mat iakhih ban pynduna ia ka jingbun paid, kaei kaba ngi lah ban leh? Namar ki nongialam sain hima sima na ka jaid bynriew Muslim ialade ki don tang 2 ngut ki khun, hynrei kim ju hikai pat ia ki paidbah shaphang kata ka lad ka lynti ban pynduna ia ka jingbun khun lane ban don tang 2 ngut ki khun.” ong u Sarma.
