Kumba ka Khasi Students Union (KSU) ka la rai ban dang bteng ka talasi ia ki nongtrei ba wan na shabar ka jylla, wat hadien ka jingiakynduh mynta ka sngi, ba la khot kyrpang da u Myntri rangbah ka jylla, u Conrad K. Sangma kum u Myntri jylla, u la ban jur biang da kaba ong, ba kino kino ki kynhun kim don hok satia ban talasi ia ki nongtrei kiba wan na kiwei ki jylla (interstate Migrant workers).
Haba kren sha ki lad pathai khubor, U Myntri rangbah ka jylla, u Conrad K. Sangma, u la iathuh ba ka tnad Pulit ka jylla ka la dep ban mudiu haduh 10 tylli ki mukotduma pyrshah ia ki kynhun seng ne ki riew shimet kiba don kti ha kum kane ka kam talasi beaiñ ia ki nongtrei bylla kiba wan na shabar ka jylla. U la pynthikna ruh da kaba ong ba ka sorkar kan pynthikna ban pyntreikam katkum ki kyndon aiñ bad kino kino kiba don kti ha kum kine ki kam beaiñ ki nym lait ia ka jingpynshitom kiba dei katkum ki lynti jong ka aiñ. U la bynrap.
Ha kawei ka pat ka bynta, u Myntri rangbah ka jylla, u Conrad K. Sangma, u la pyntip ba ka sorkar jylla ka la dep ban shim khia ban pynsngew sha u myntri ka tnad ka kam pohing ka sorkar pdeng, u Amit Shah bad u Home Secretary ka sorkar pdeng, halor ki mat jong ka 8th schedule, ILP bad ka MRSSA bad pynpaw ruh ba ka sorkar pdeng ka dang tohkitbniah halor kane ka kam.
Shuh shuh, u la pyntip ruh sha ka kynhun ka seng KSU, ba ka sorkar jylla ka la dep ban sdang ban pyntreikam ia ka MRSSA, 2016 bad la dep ruh ban thung ia ki Committee bapher bapher.
