U Bah Mayral Born Syiem MLA ka Nongpoh ba dei ruh u Chairman ka Meghalaya State Advisory Board, haka jingdon lang u Myntri Rangbah ka jylla u Conrad K Sangma, mynta ka sngi u la leit ban ïakynduh ïa u Jyotiraditya Scindia Myntri ka tnad Development of North Eastern Region (DoNER) jong ka sorkar pdeng ha nongbah Shillong ban buh ka jingkyrpad naka bynta ban pynsted ïaka jingmang pisa naka bynta ka surok Nongpoh-Umden-Sonapur.
Naka liang u Bah Mayral Born Syiem u la aiti ruh da ka jingthoh sha u tei u myntri ban kyrpad bad ban mang pisa kumba 52.98 klur lyngba ka NESIDS (Roads) jong ka Ministry of DoNER, naka bynta ban siang rong pynbha ïa ka surok Nongpoh-Umden-Sonapur kumba 20 km hadien ba ïa ka jingtyrwa (Proposal) la dep ruh ban phah sha u Secretary ka North Eastern Council lyngba ka tnad Planning, Investment Promotion & Sustainable Development jong ka sorkar Meghalaya katkum ka shithi No PLR.2/2017/192 haka 25 tarik Jylliew 2024.
Kum ban shu kdew hangne u surok Nongpoh-Umden-Sonapur u dei u ba la jot rathai bad ki paidbah da ki spah phew tylli ki shnong ki mad jingeh haka leit ka wan, bad dang shen kawei ka longkmie naka shnong Mawlong, Nongtluh kala leit ban shah thngan marwei ha Secretariat naka bynta ban pynbor ïaka sorkar ba dei ban shimkhia ban pynmang pisa naka bynta ban siang rong ïa utei u surok bad ioh ruh ka jingkular, hynrei u MLA hi u hap ban shim ka jingkitkhlieh ban leit tynruh naka bynta ban ioh ka jingmang pisa.
U Bah Mayral Born Syiem u la kyrpad ruh hakhmat utei u myntri ban pynsted ïaka jingpynmang pisa ban ioh sdang noh ïa u tei u surok naka bynta ka jingbit jingbiang jong ki paidbah.
