Kumba ka jingkyn-ad na ka bhah thung kam thung jam ha ka ri Bangladesh kala nang jur kat nang mih ki sngi. Bun na ki samla pule bad ruh kito kiba sah ha katei ka ri, kiba dei ki nongshong shnong na kiwei pat ri, ki la hap ban phet krad sha la ki jong ki ri ki jongki ban lait na ki jingjia ba sngewsih.
Kum ban shu pynkynmaw biang, dang ha kine ki shi sngi ar sngi, na ka liang jong ka Indian High Commission ha Dhaka, ka la dep ruh ban pynmih ia ka jingbthah ba ki nong India kiba don hapoh katei ka ri, kidei ban ialeh katba lah ban nym mih shabar na ki jaka sah ki jongki.
Na ka liang u Nodal Officer ba la thung ka sorkar jylla ban khmih ia katei ka jaka rung jaka mih jong ka ri India bad Bangladesh kaba don ha Dawki, u Bah Hiwot Rymbai, u la pyntip ba tang mynta ka sngi, ki don kumba 284 ngut kiba wan rung lyngba ka ICP Dawki ba kynthup ia 115 ngut ki nong India, 168 ngut ki nong Bangladesh bad uwei u nong Canada. Na kitei baroh, ki don kumba 8 ngut ki badei ki nongshong shnong ka jylla Meghalaya.
