Ki pulit jongka Umiam Police Station ha ka janmiet jong ka sngi Saitjain, ki la lap noh ia ka met jong ka kawei ka longkmie na Nongmensong, East Khasi Hills District kaba la jah la nala ing ha ka por mynstep kumba 7-8 baje eiei ha katei kajuh hi ka sngi, kaba la per ha sla um jong ka pung Umiam.
Katkum ka tyllong khubor na ki pulit, la iathuh ba katei ka longkmie, la tip kyrteng kum ka Kong Diamond Chyne, 67 snem ka rta bad ia ka met ka jongka la ithuh da ka khun, ka Kong Sweet A Chyne lem bad ki bahaing hasem.
Ha ka jingtohkit (inquest) jong ki pulit, la shem ba ymdon satia ki dak mynsaw ha ka met jong katei ka longkmie bad la pynkit noh sha Nongpoh Civil Hospital na ka bynta ban pyndep ia ka eksamin post mortem.
Wat lada ka liang ki bor pulit ki la batai bad pynshai ia ki bahaing hasem halor ka jingdonkam bad myntoi jong ka eksamin post mortem, hynrei na ka liang ki bahaing hasem naba kim don ka jingtharai sniew, ki la kyntait war bad kyrpad ki bor pyniaid District ban pynlait ia katei ka eksamin post mortem.
Ia katei ka jingkyrpad jong ki bahaing ban pynlait ia ka eksamin post mortem, la pdiang da u Bah MB Tongper, Additional Deputy Commissioner ka Ri Bhoi District bad ki bor pulit ka Umiam Police Station ki la aiti noh ia ka met kaba sah jong katei ka longkmie sha ki bahaing na ka bynta ba kin pyndep ia ka jinglehniam lehrukom kaba khatduh.
