Nongpoh, Nailur 11: Ki Pulit ka Ri-Bhoi District mynta ka sngi ki la pynlong ka jingtalasi kali ha surokbah National Highway, khamtam ha ka thain Mawdiangum. Kane ka jingtalasi ka dei hadien ka jingmaham kaba ki Pulit ki la dep ai sha ki paidbah ba kim dei ban pyndait ïa ki iit iong (tinted Glass), ki LED light bad ki siren khlem da ioh jingbit na ka sorkar.
Ha kane ka jingtalasi, ki Pulit ki la lap shibun ki kali naduh ki kali 2 shaka, 3 shaka haduh ki 4 shaka kiba la pynkheiñ ïa ki kyndon aiñ da kaba pyndait iit iong bad ki LED light kiba thaba bad pynwit ïa kiwei pat ki nongñiah ha surok. Ym tang katta, hynrei bun ruh ki kali kiba shah talasi kim shym la don ïa ki kot ki sla kiba biang kum ka Driving License bad ki kot kali. Ha kane ka sngi la ioh ban dain kuna na ki Kali ba pynkheiñ aiñ ba la kot sha ka 1 lak tyngka.
Ki Pulit ha katei ka por ki la shim khia da kaba tar bad khang ïa ki kali kiba tah iit iong, bad ki la bthah ruh ïa ki trai kali ba kin weng mardor ïa ki LED light kiba long pyrshah ïa ka aiñ. Ryngkat bad ka jingmaham ba khlaiñ ïa baroh ban bud ryntih ïa ki kyndon aiñ ñiah kali.
Haba kren sha ki nongthoh khubor, u Additional Superintendent of Police ka Ri-Bhoi District, u Orville Massar, u la ong ba kane ka jingtalasi ka dei kaba la pynlong katkum ka jingbthah na u Superintendent of Police ka district.
U la bynrap ruh ba ka thong ka long ban tehlakam ïa ka jingpynkheiñ aiñ bad ban peit bniah ba ki nongñiah kali ba kin don ïa ki kot ki sla kiba pura katkum ka aiñ bad ïa kane ka jingtalasi yn bteng ha baroh kawei ka district.
Shuh shuh, u la bynrap ruh da kaba ther tyngeh ba ki Dribar haba ki la bat ia u Steering Kali, ki dei ruh ba don ka jingkitkhlieh ia ka kali ban pynbiang ia ki kot ki sla bad ia baroh ki jingdonkam.
