Nongpoh, Nailur 10: Ki Pulit ka Umsning Police Station, hynnin ka sngi baar ki la leit ban tam ia kawei ka metiap ba la sah tang ka shynrong na kawei ka khlaw kaba don hajan ka 6th Battlion, Umran Niangbyrnai, Ri Bhoi.
Katei ka Metiap ba la sah tang ki shyieng, ka la dei ka met jong uwei u rangbah ba la jah na ka shnong Ummar, uba la jah ha ha ka 11 tarik u Jylliew 2025, kata ka dei ba u la hiar na kali ha ka por ba u wanphai na Shillong ban leit sha ka Shnong Ummar ha ka thaiñ Ri Bhoi Sepngi.
Kane ka jingpynshisha ba katei ka met iap ba la sah sa tang ka shynrong ka dei kaba la lah ban bishar bniah da ki riam jong u bda ka Mobile Phone, ha kaba wat kiba haïing ruh ki la pynthikna ba ka dei ka met jong u.
Haba iadei bad katei ka jinglap ia katei ka metiap, la ong nyngkong la lap da ki nongthohdieng sha katei ka khlaw, ha kaba ki la lap naduh ka janmiet sngi nyngkong bad hadien kata ki la pyntip sha ki briew shnong bad ki briew shnong pat ki la pyntip noh sha ki Pulit ka Umsning Police Station.
Kumba la ioh lum jingtip na ki Pulit ka Ri Bhoi, la ong ba tang mar ia ioh jingitp hynnin ka sngi ki la leit mar mar sha katei ka jaka ba la lap ia ka metiap, ha kaba la lap sa tang ki shyieng ban pynlong ia ka jingtohkit bad mynta ka sngi kiba haïing hasem ki la wan poi ban pynthikna ruh ba ka dei ka met jong utei u rangbah ba la lah ban ithuh lyngba ka riam ka beit jong u bad ka Mobile phone.
Na ka liang u Bah Andrias Tron kum uba haïing hasem ruh u la pynshisha ba katei ka met ba la lap da ki pult ka dei ka met jong utei u rangbah ba la jah, ha ia ki sabut la lap hi da ki riam bad ka Mobile phone khamtam ka Simcard kaba u pyndonkam ia katei ka phone.
