Shillong, Naitung 21: U Myntri ba dei peit ia ka tnad pule puthi ka jylla Meghalaya, u Rakkam A. Sangma mynta ka sngi u la mih shakhamt ban ai jingmut ia u nongialam ka liang pyrshah u Dr. Mukul Sangma ba un pyndonkam noh da ka skhim MLA ha kaba maramot ia ki skul kiba la jot kiba don hapoh ki Constituency.
U Rakkam kum u myntri ka tnad pule puthi, u la ai jingmut ban pyndonkam da ka MLA skhim ha kaba maramot ne pynba ia ki skul, ka dei halor ka jingjubab ia ka jingkynthoh u Dr Mukul Sangma, uba la kytnnoh ba ka sorkar kam shym la leh eiei ban maramot iaki skul ha kylleng ka Jylla.
Haba kren sha ki nongthoh khubor, u Rakkam u la ong ba u kyntu jur ia ki para MLA ba ki dei ban don ka jingkitkhlieh lem ban wan rah ia ka jingkylla da kaba kin mang pisa ha kaba maramot ruh ia ki skul kiba la jot ha ki Constituency jong ki.
U la ong ruh ba da lade kum u MLA u la dep ban pynthymmai haduh 45 tylli ki skul Adhoc bad SSA ha ka constituency jong u lyngba ka skhim MLA ha kaba kawei kawei ka skul ka ioh T. 2 lak ban maratmot pynbha ia ki skul.
U la ong ruh ba lada man la u MLA u lah ban pynthymmai ne tei kumba 50 tylli ki skul man la u snem lyngba ka SRWP scheme, kane kan long shisha ka jingiarap bad lah ban wan rah ia ka jingkylla ha kaba pynbit pynbiang ia ki skul pule.
U la iathuh ruh ba ka don ka jingeh ha kaba na ki 14,000 tylli ki iing skul ki ba don ha ka jylla tang kumba 3000 tylli dang lah ban pynbha bad bun ki dang sahteng.
Ha kawei ka bynta, u ai ruh ia ka jingiaroh ia u myntri rangbah ka jylla ba ha ki saw ne san snem ba la dep ka sorkar ka la rai ban pynbha ia ki skul kiba la jot ne julor bha ne wat ban ai da ka ïingskul kaba thymmai.
Namarta, kum u myntri sorkar ka jylla, u Rakkam u la buh ruh ka jingkyrpad ia baroh ki MLA bad MP ba buh shwa ia ka kam hakhmat eh bad ban sangeh ka kam kynthoh bad ruh ban mang pisa lyngba ki skhim jong ki ban pynbha ne pynthymmai ia ki skul khnang ban wan shisha kata ka jingkylla haba don kata ka mynsiem ia trei lang kum ki para nongmihkhmat, ula bynrap.
Ai jingmut u Myntri ka tnad Pule ia ki MLA Ban maramot ia ki skul lyngba ki MLA scheme
