Nongpoh, Naitung 21: Ka sur jong ki paidbah na ka thaiñ Western Ri Bhoi mynta ka sngi ka la sawa jam bha ban pynrem ia ka sorkar bad ia ka tnad MeECL halor ka jingbym lah ban pynbiang ia ka bording ba thikna, ba ki paidbah ki kynduh jingeh na ka jingbym biang ka bording kaba ki hap ban shah na ka por sha ka por ha katei ka thain Western Ri Bhoi.
Daka jingsngewkhia kaba jur, ki paidbah nongshong shnong bad kynthup naduh ki nongialam shnong, ki nongshong shnong bad ki khynnah skul mynta ka sngi ki la mih madan ban iaid paidbah ba la lamkhmat da ka HYC Western Ri Bhoi ban pynpaw ia kata ka mynsiem jong ka jingsngewkhia halor ka jinglip bording ba khah khah sha katei ka thaiñ,
Ha kane ka jingiaid paidbah ba la pynlong da ka HYC Western Ri Bhoi la pynlong ha Patharkhmah ha kaba ki paidbah bad ki khynnah skul ki la rah da ki placard bad ki banner ryngkat ki jngthoh ban pynrem jur ia ka jingbym baing ka bording ilektrik bad ha kawei ka bynta ki la dawa ruh na ka sorkar bad na ka tnad MeECL ba dei ban buh noh da ka 33 kv power station khnang ba ki paidbah kin lait na ka jinglip bording kaba la ktah ha baroh ki liang.
Ki nongkren naduh u Rangbah shnong ka Patharkhmah, u Bah Petalman Thangkheiw, u President ka HYC Western Ri Bhoi, u Bah R.C Thangkhiew lem bad kiwei ki la ai jinkren bad dawa ruh na ka sorkar ba dei ban pynbiang ia ka bording ilektrik bad ruh ban buh noh ia ka 33 KV Power Station khnang ban lait ki paidbah na ka jingshah ktah kaba ki jynjar na ka jinglip bording kaba la shah ktah mynta la bun phew snem.
Kiba bun ruh ki la pynpaw, ba ka tnad MeECL kam lah shisha ban pynbiang ia ka bording ilektrik bad ia ka bai bording pat ki paidbah ki hap ban siew man la u bnai bad ki don ruh ki shnong ha khappud ki hap ban shim bording na Assam na ka daw ba ki siew ha ka dor kaba tad bad kim ju shah ktah na ka jinglip bording kumba shah ktah ki paidbah katei ka thaiñ Western Ri Bhoi.
