Shillong, Rymphang 23: Haba kren halor ka jingshngain ki paidbah ha ka leit ka wan lyngba ka surokbah National Highway ka jylla naduh na Ratachira shaduh sha Jorobat ha Ri Bhoi District, u MLA ka Nongpoh u Bah Mayral Born Syiem u la pynpaw ba la donkam ban don ki jaka pynieng ia ki trok harud ka surok (Parking Bay) khnang ba kane kan iarap ban lait na shibun ki jingjia ba sngewsih ia ki paidbah ba leit ba wan lyngba ka surokbah National Highway.
Ia kane ka phang la pynpaw da u Bah Mayral Born Syiem, MLA ka Nongpoh ha ka dorbar mang tyngka lyngba ka governor’s Address, ba u la pynpaw ba ka long shisha kaba donkam ia ki trok ba kin ieng ha ki jaka ba biang khnang ban shngain ki paidbah ba leit ba wan lyngba ka surokbah.
Haba kren halor kane ka phang, u la pynkynmaw ruh ba dang shen bun ki khynnah skul ki la mynsaw hadien ba kawei ka trok ka la leit tynrah kynsan ia ka Bos skul ha 18mer bad ban lait na kum kine ki jingjia ba sngewsih la donkam ba ki trok kin don ia kita ki jaka ieng harud ka surokbah.
Kum u MLA u la pynpaw ruh hakhmat ka sorkar ba la donkam ba kan kren sha ka Ministry of National Highway bad sha ka sorkar pdeng ban thaw ia ki lad ki lynti na ka bynta ban don noh kita ki jaka ieng jong ki trok ki ban nym buh jingma ia ki kali paidbah ne ki paidbah ba leit ba wan lyngba ki surokbah.
Shuh shuh, u la bynrap ruh bun ki trok kiba iaid ha kane ka surokbah ki dei kiba wan na kylleng ki jylla bad teng teng ki donkam ban shongthaid, hynrei namar ba ym don ka jaka ieng kaba biang kihap ban ieng harud ka surokbah National Higway ba teng teng ki mih pat ki jingjia ba sngewsih ia ki paidbah, u la bynrap.
