Haduh 19 ngut ki briew ki la iap noh ba kynthup ia ki khynnah bad u Pulit, hadien ba ka Bangladesh Air Force Jet ka la hap kynsan hajan kawei ka skul ha Dhaka ba hap ha ka thain Uttara.
Katkum ka tylong khubor na ki Bangladesh military bad ka tnad ba dei peit ia ka Fire emergency ka Bangladesh, la ong ba ka jet F-7BGI fighter ka dei kaba pyndonkam ha kaba ai jinghikai bad tang hadien ba ka la sdang ban kiew sha suin ba ka la hap noh sha ba don ka skul bad ka Kolej, ba ki khynnah skul ki dang don ha klas bad ha ka examination.
Ka skul kaba don kumba 2,000 ngut ki samla pule ka dei kaba sdang naduh ka elementary haduh Class 12. Katkum ka khubor ba la phah da ka sorkar ha Dhaka, ki la poi haduh 83 ngut kiba la shah sumar ha ka Hospital ha Dhaka na ka jingmynsaw bad da ki spah ngut ki la mynsaw jur.
Ka tnad shipai ka la pyntip ruh ba kane ka jet ba la shna ha China ka la sdang ban her ha ka por 1:06 mynsngi bad tang hadien katto katne por ka la hap noh na suin sha khyndew, kaba la wan rah ka jingiap kiba bun bad ryngkat kiba la mynsaw.
Halor kane ka jingjia, u Interim Leader u Muhammad Yunus u la pynpaw ia ka jingsngewsih kumba u la pynlait ha ka X bad khein ruh ba kane ka jingjia ka dei ka jingjia kaba la duhnong bha ia ka tnad Air Forice bad ia ki khynnah skul bad kaba ym lah shuh ban dang pynbha biang.
Ïap 19 ngut, mynsaw bun ngut ba hap kynsan ka Air Force Jet ha Dhaka
