Kawei ka heprit ba dang 13 snem ka rta kala duh noh ïala ka jingim hadien ka jingbthei bom haka jylla West Bengal katba dang ïaid ka jingñiew vote naka bynta ka elekshon shiteng samoi ha Kaliganj Constituency.
Katei ka jingbthei haka jia haka shnong Barochandgar ha West Nadia District hadien ka Trinamool Congress kala lamkhmat haka jingñiew vote, haduh ba kawei ka heprit kaba dang shong class 4 kala duh noh syndon ïala ka jingim ha katei ka jingbthei.
Naka liang ka Myntri Rangbah jong ka jylla West Bengal ka Mamata Banerjee kala pynpaw ka jingsngew kyndit kaba bad sngewsih jur halor ka jingiap jong kawei ka heprit ha ka jingbthei bom ha Barochandgar, bad phah ruh ka kyrwoh sngewlem sha ka iing ka sem da kaba bynrap ruh ba ki pulit kin leh da kaba tyngeh katkum ka aiñ pyrshah briew ba donkti ha katei ka kam.
Kum ban shu kdew hangne ka jingkhlad noh u MLA Nasiruddin Ahmed ha u bnai Rymphang mynta u snem ka la pynlong ïa katei ka constituency ban hap jied biang ïa u/ka nongmihkhmat, bad ha ka jingñiew vote ka khun jong u MLA bala khlad noh ka Alifa Ahmed kaba dei ka kyrtong jong ka party Trinamool Congress kala ioh ban khur haduh 1,02,759 votes bad tam kput haduh 50,049 ïa u kyrtong ka BJP u Ashish Ghosh u ba la ioh tang 52,710 votes katkum bala pynmih da ka ECI.
