Nongpoh, Jylliew 15: Ka Mahatma Gandhi University (MGU) ka la jam shakhmat ha ka sienjam ban ai jingshakri kaba paka ha ka liang ka koit ka khiah na ka bynta u paidbah, da kaba la pynlong ïa ka jingpynbam smai kaba nyngkong eh ïa ka kynhun ki Nurse ba pule ha ka General Nursing and Midwifery (GNM) bad Auxiliary Nurse Midwifery (ANM) lyngba ka Mahatma Gandhi Institute of Nursing kaba don ha kane ka skulbah.
Ha ka sngi Saitjaiñ, ïa kine ki samla Nurse la leh burom da kaba thang ïa ki sharak kum ka dak jong ka jingshai ha ka lynti ba kin aiti ïa ka jingim ban shakri ïa kiba pang ba shitom. Ka jingpynbam smai ka long kum ka burom ba ki la sdang ban ïaid ha ka lynti shakri ha kane ka kam kaba khraw lyngba ka jingpule jong ki.
La kynmaw burom ruh ha kane ka sngi ïa ka Florence Nightingale, ka riew kynthei kaba la long ka nongai mynsiem ïa ka pyrthei ha ka liang ka jingshakri kiba pang, bad kaba la lam lynti ha ka kam Nurse kum ka nongsharai khlem jingkheiñ ïa lade.
U Medan Balibert Langbrang, u Deputy Nursing Superintendent ka ARHI Hospital Jorabat, u la long u kongsan ha kane ka jingialang, ha ryngkat ka Kong Itees Muktieh, ka Nursing Supervisor ka PHC Byrnihat, kaba la long ka symbud kongsan. La donlang ruh u Vice Chancellor ka MGU, u Dr. Sagar O. Manjare, u Registrar ka Dr. Sarika Dixit, bad u Dean ka Health Science, u Dr. Y.K. Reddy, uba la pyniaid ïa ka jingpynbam smai.
Ha kane ka sngi, ki nongkren ki la ai jingïaroh bad jingsneng sha kitei ki samla ba wan pule, da kaba ai mynsiem ban ïai bteng ïa ka jingpule bad ban long kiba kloi ban shakri ha ka kam sumar pang. U Bah Medan bad ka Kong Itees ki la pynpaw ruh ba ka kam Nurse ka dei ka kam kaba da aiti met bad mynsiem, kaba donkam ka jingieit, jingshemphang bad ka jingsarong ban shakri hok na ka bynta ka imlang sahlang.
