New Delhi, Jylliew 15: U Myntri ka sorkar pdeng ba dei khmieh ia ka tnad Road Transport and Highway u Nitin Gadkari u la pynbna da kaba khubor kaba sngewtynnad ia ka jylla Meghalaya da kaba pynmang pisa haduh 951.27 klur tyngka ban tei ia u surok Tura Bypass hapoh kane ka jylla.
Katkum ka jingpynbna jong u Union Minister ka tnad Road Transport and Highway, u Nitin Gadkari u la pynbna ruh lyngba ka rynsan social media ka sla X ha kaba u la pynbna paidbah ia kane ka jingmang pisa sha ka jylla Meghalaya ban tei surok Tura Bypass.
Ha katei ka rynsan u la pynbna, ba ha Meghalaya la mang pisa 951.27 klur tyngka ban tei ia u surok Tura Bypass u ban pyniasoh na National Highway 127B sha National Highway 217 ban shna da u surok arliang (Two Lanes) kaba kham heh kane ka project kan dei na bynta u surok ba jrong kumba 29.03 kilometres ha Tura.
La kdew ruh, ba u NH-217 (mynshwa NH-51) u dei u surok u ba kongsan ba pyniasoh na Guwahati sha Dalu bad u hap ruh hapoh ka International border bad ka Bangladesh bad kan long ruh ka jaka kaba kyrpang ban don da ka tnad Custom ban pyrkhing ia kiba jingiakhaii pateng hapdeng ka India bad Bangladesh.
Kane ka jingthmu ban tei surok bypass kan sdang najan ka shnong Sanchonggre hapoh u NH-127B bad kut haduh ka shnong Jenggitchakgre ha u NH-217 kaban pynsuk bad pynlait ia ka jinglong khapngiah ha ka sor Tura namar ka jingrit u surok bad ka jingnang bun ki kali.
