Uttarkhand, Jylliew 15: Tang hadien katto katne sngi, ba ka India hi baroh kawei ka dang iam pangnud namar ka jingiap briew kaba shyrkhei na ka jinghap bad bthei ka liengsuin Air India Boeing 787-8 Dreamliner kaba la jia ha Ahmedabad bad, mynta ka sngi ka la don pat sha ka jingiap jong ki 7 ngut ki nongleit jingleit ha kaba kawei ka helicopter ka la hap ha ka thaiñ Gaurikund ha Uttarakhand.
Kumba la ioh jingtip kine ki briew kiba la khlad noh na ka jinghap bad bthei jong ka helicopter mynta ka sngi U Blei mynstep, kaba ki shong ki dei ki paid riewngeit Hindu kiba dang leit leitniam sha ka Kedarnath Temple kaba don ha Uttarkhand.
La ioh khubor ba kane ka dei ka sien kaba 5 ba la don ka jingjia hap bad bthei ki helicopter hapoh ki 40 sngi. Kane ka helicopter ka dei kaba dang her na Kedarnath sha Guptkashi kaba la hap noh ha kawei ka khlaw hajan ka Gaurikund bad Sonprayag na kine kiba khlad la donlang ruh u khyllung ba 10 snem kynthup ia u pilot.
Ki bor pulit ka Uttarkhand ki dang pynlong ia ka jingtohkit halor katei ka jingjia hap katei ka helicopter kaba la pyniaid da ka Aryan Aviation Pvt. Ltd.
