Nongpoh, Risaw 17: U Senior Superintendent of Police ka Ri Bhoi, u VS. Rathore u la pynpaw ba kum u heh Pulit ka Ri Bhoi u don ia kata ka jingangnud kaba khraw ban pynlong ia ka Ri Bhoi District kum kawei na District kaba lah ban pynduhjaid ia ki kam sniew khnang ba ki paidbah kin ioh ban don hapdeng ka jingshongsuk ka shongsaiñ.
Ia kane u la pynpaw haba kren sha ki lad pathai khubor hadien ka jingtalasi ia ki Kali ba pynkheiñ ain hynnin ka miet ha Quinine bad ruh ba ka tnad Pulit ka la ioh ban dain kuna haduh 5 lak tam ba kynthup ia ka kuna ba la ioh lum bad ha kiwei kiwei ki bynta jong ka jingtalasi Kali ha Ri Bhoi.
“Ngi donkam ia ka jingiatrei lang na baroh ki liang ban pynduhjaid ia ki kam sniew ba kynthup naduh ka kam rahbor ki khyllung ki khynnah, ki jngshah lehbein ki riew kynthei, ki kam tuh ki kam lute, ki kam pyniap briew bad kiwei kiwei ki kam sniew” ong utei u heh pulit bad bynrap ruh tang ka tnad pulit kan nym lah ban leh ei ei hynrei lada don hi ka jingiatrei lang ngin lah ban pynduhjaid ia ki kam sniew ha kane ka District bad ha ka jylla hi baroh kawei” u la bynrap.
Shuh shuh, u la bynrap ruh da kaba ong, dei namar kane ka daw ka tnad Pulit ka khot ia ki VDP ruh ban ia trei lang ha kane ka jingkhynra kali ha man la ki bynta jong ka District, namar ha Ri Bhoi District ki don haduh 600 tam ki Shnong bad lada treikam shisha ki VDP ha man la ki shnong ngin lah lut ban rad dyngkhong ia ki kam sniew, ha kaba wat ia ki kam sniew kiba rit ruh ngi lah ban ioh jingtip bad kin nym don jaka ha ka imalang ka sahlang lada trei lang ki VDP bad ki nongialam Shnong.
