Shillong, Risaw 18: Kum kawei na ka thong jong ka seng Hynniewterp Youth Council ban ia da ia ka mei mariang bad ruh ban pynsngewthuh ia ki nongwan jngohkai pyrthei sha ki rilum Khasi Jaintia bad khamtam ha ka thaiñ Sohra, ka HYC lyngba ka Environment Cell, HYC CEC mynta ka sngi ki la mih paidbah ban sam ia ki kot lyngkdop ban pynsngewthuh ia ki paidbah bad khamtam ia ki nongjngohkai pyrthei ba ki hap ban ia snoh kti lang ban leh khuid bad ruh ban iada ia ka mei mariang.
Na ka liang ki nongialam ka HYC lyngba ka Environment Cell ki la mih sha ki surok ban sam kyrpang ia kitei ki kot lyngkdop kiba la pynmih kyrpang da ka HYC halor ki jingbtah kiei kiba dei ban leh bad kiei kiba lah ban leh na ka bynta ban pynneh pynsah ia ka jingitynad ka rilum khasi bad kumjuh ruh ban iada ia ka marianig.
La sakhi ruh ba ki dkhot ka HYC ki la leit sam kyrpang ruh ia kitei ki Kot Lyngkdop sha ki nongwan jngohkai pyrthei ban pynsngewthuh ia ki ba kin ai ia kata ka jingiatrei lang ban nym bret pathar ia ki jaboh ne ban pynjot mariang bad ruh ban nym bret pathar ia ki plastic kiba ktah ia ka jingitynad ka rilum Khasi Jaintia bad ruh kiba ktah ia ka mariang da kaba bret pathar ia ki jaboh.
Kumba la pynpaw da u Samla Francis G Mawlong, Vice President ba dei peit ia ka Administration ka seng kmie, u la ong ba ka seng ka la shim ia kane ka sienjam ban sam ia kitei ki kot lyngkdop ka dei ka thong ban pynsngewthuh ia ki paidbah bad khamtam ki nongwanjngohkai pyrthei ba kin nym dei ban bret pathar ia ki jaboh bad ki dei ban ai ka jingiatrei lang ban pynneh pynsah ia ki jingitynnad ki lum ki wah, ki kshaid bad kiwei kiwei kiba la ai sngewbha da u Blei ha kane ka rilum Khasi jaintia jongngi.
U la iathuh ruh ia kane ka kot lyngkdop la pynmih da ki seng ryngkat ki jingthoh ban kyntu kynpham ia ki paidbah bad ruh ia ki nongjngohkai pyrthei kiei kiba dei ban leh bad kiei kiba ym dei ban leh, ban pynneh pynsah ia ka khuid ka suba bad ban iada ia ka mariang ha kane ka rilum kaba itynnad ba la ai sngewbha da u Blei.
Shuh shuh, u la kham ban khia ruh kaba hakhmat eh ba ka seng ka la kyntu lyngba ka jingsam ia kine ki kot lyngkdop ka long ban sangeh ka bret jaboh, plastic bad kiwei kiwei kiba jaboh kiba pynsniew dur ia ka jingitynnad ki lum ki wah bad ka maraing bad ka long ruh kaba sngewkmen ba bun ki paidbah ki ia snoh kti lang bad ki kloi ban ai kata ka jingiatrei lang na ka bynta ban pynneh pynsah ia ka jingitynnad ka rilum khasi bad ki jingitynnad ka mariang ba la ai kyrpang da u Blei.
