Nongpoh, Risaw 18: Ban kyntiew ia ki khun samla ba don sap ha ki kam ialehkai phutbol bad ruh shi bynta bna ialap halor ka jingktah jong ki jingdih kiba sniew khamtam u drok uba la pynjot ia bun ki khun samla, ka Umsning People’s Front ka la rai ban pynlong da kawei na ki lympung ialehkai phutbol ba la ai kyrteng ‘UPF Super Cup Football Tournament’ ban sa pynlong ha Madan ialehkai ka Shnong Umran Niangbyrnai.
Haba kren sha ki lad pathai khubor, u General Secretary ka UPF u Bah Kitdorius Dkhar bad u Sport Secretary u Bah Sumarlang Swer, ki la ong ba ka UPF ka la shim ia kane ka sienjam ban pynlong ia kane ka tournament ka dei ka jingthrang ban ai lad ia ki samla ba don sap ha ki kam ialehkai phutbol na ki shnong ba hap ha ka Umsning Constituency.
Ki la ong ruh ba kane ka tournament kan sdang naduh ka 22 tarik u Risaw 2025, ha kaba ka bai rung kan long tang 2500 kawei ka kynhun ba shim bynta bad na ka liang ka UPF ka angnud ba ki kynhun ialehkai na ki shnong ba hap ha ka Umsning Constituency kin wan ban shim bynta khnang ban pynlong ia kane ka tournament kaba jop bad kaba ai jingmyntoi ia ki samla.
Ki la iathuh ruh kum shi bynta ban pynshlur ia ki kynhun ba wan ban shim bynta la pynkhreh ruh ia ka khusnam na ka bynta ki kynhun ba jop, ha kaba ka kynhun kaba long ka lahduh kin ioh ban khur ia ka song pisa kaba T. 1 lak bd kaba wan baar kin ioh khur ia ka song pisa kaba T. 50 hajar.
Shuh shuh, ki la ong ruh na ka liang ka UPF ka khot ka wer ia baroh ki kynhun ban wan ban shim bynta ha kane ka tournament bad ka jingwan shim bynta ki kynhun kan long ka jingjop halor ka thong ban ai rynsan ia ki samla don sap bad ha kajuh ka por long kum ka jinghikai ban ia khun pyrshah ia ki jingdih kiba sniew bad khamtam ia u drok uba long u nongshun jong ka imlang ka sahlang.
Shuh shuh, na ka liang u Bah Sumarlang Swer u la iathuh ruh ba ka UPF ka la rai ruh ban pynlong ia ka Youth Soccer Camp kaba sdang naduh ka 25 tarik u Risaw 2025 na ka bynta ki khynnah shynrang bad kynthei naduh kiba la dap 5 snem ka rta haduh 19 snem ka rta ha Gracia Futsal Turf Maryland Umsaw nongkharai bad kane ruh ka long kawei na ka tong ban sei madan ia ki samla don sap ha ka kam ialehkai phutbol.
