Nongpoh, Rymphang 23: U MLA ka Mawhati u Bah Charles Marngar haka dorbar mang tyngka mynta ka sngi u la pynpaw ka jingsngewnguh ïaka sorkar khamtam ïa u Myntri Rangbah ka jylla u Conrad K Sangma halor ka sienjam ban kyntiew ïaki nongrep lyngba ka skhim CM Assure kaba la sdang ha u snem 2025.
U la ong ruh ba ki nongrep synsar haka thaiñ Mawhati bad ki nongrep haka jylla baroh kawei ki dap da ka jingkmen bad ioh mynsiem lyngba kane ka skhim, namar ha shuwa ka jingsdang ïa kane ka skhim ki nongrep ki don hapdeng ka jingeh kaba khraw namar u synsar um don dor ha iew ha hat kaba la ktah shisha ïaki nongrep, bad ha kum katei ka por ka dor jong u synsar ka long tang T.25 haduh T.30 shi kilo, hynrei lyngba ka skhim CM Assure ka jingthied ïa u synsar kala poi haduh T.55 shi kilo.
Kane jingleh jong ka sorkar kala ai mynsiem bad pynkmen biang ïaki nongrep bad lyngba kane ka skhim 53 klur la pynlait ban ïarap ïa kumba 13 hajar ngut ki nongrep synsar, bad kane ka long ka history naka bynta ki nongrep synsar ba dei lyngba ka jingshimkhia jong ka sorkar bad ki nongrep kin kynmaw bad pyrto ïakane kane ka sienjam bala shim da ka sorkar.
“Kumba ngi tip ba ki nongrep ki dei ki budlum jong ka imlang ka sahlang, nga kymren ba hapoh ka jingïalam jong u Myntri Rangbah ki nongrep kin bteng ban ioh ka jingmyntoi bad ki lad ki kabu ba kin dang kiew shaphrang haka ioh ka kot” la ong u Bah Charles da kaba bynrap ruh ba kum u nongmihkhmat u kyrmen ruh ba ki nongrep kin dangkiew shaphrang bad shakhmat ba kin dang lah ban kyrshan ïaka iing ka sem bad ban ai ruh ka lawei ba phyrnai ïaki khun ki kti.
Kum u nongmihkhmat u la pynsngew ruh ïa kaei kaba u la ioh ban ïakren bad ki nongrephaka por ba u leit ban jngoh bad pynlut por bad ki, haba ki nongrep kila ioh ka jingmyntoi na katei ka skhim, donkam ruh ban dang pynjanai shuh shuh ban dang kyntiew ïa kane ka skhim, namar kumba long mynta ka sorkar lyngba katei ka skhim ka sorkar ka thied kumba 800kg u synsar na uwei u nongrep bala ddep register haka dor T.55 shi kilo, bad ki nongrep ki kmen halor kane ka sienjam.
Bun naki nongrep ki pynmih palat 1500 kilo u synsar hynrei ka sorkar ka thied tang kumba 800 kilo lyngba kane ka skhim bad kaba tam pat ki nongrep ki hap ban leit die haki iew ki hat haka dork aba tad.
Kumta kum u MLA u la kyrpad sha ka sorkar ban kyntiew na kaba jut hied ïa u synsar naka 800kg sha ka 1500kg na uwei u nongrep bad haka juh ka por ban kyntiew shuh shuh ïaka dor naka bynta ka jingmyntoi ki nongrep, watla kam dei kaba suk namar bun ki nongrep kila register ha kane ka skhim hynrei ngeit skhem ba ka sorkar kan shimkhia ïa kane ka mat naka bynta ka jingkiew shaphrang ki nongrep haka jylla Meghalaya, u la bynrap.
