Shillong, Naitung 16: U Special Officer ba thung da ka Meghalaya High Court u Senior Advocate u Subhasis Chakravarty hynne ka sngi u la lum ka jingialang ban iakren halor ki sienjam ban pynkynriah iaki nongdie madan na ki thain Khyndai Lad shaki jaka bala ithuh daka Sorkar Jylla.
Ia kane ka jingialang la pynlong ha kamra ka Deputy Commissioner (DC) East Khasi Hills ka Kong RM Kurbah haka jingdon lang ki bor District naduh ka tnat Pulit bad ki nongialam ki seng nongdie madan.
Haba kren shaki lad pathai khubor hadien ka jingialang u Special Officer ba thung da ka Meghalaya High Court u Special Officer u Subhasis Chakravarty u la ong ba ka jingialang mynta ka sngi bad ki bor district kynthup lang bad ka kynhun ki nongdie madan ka la long kaba seisoh.
U Special Officer Subhasis Chakravarty u la iathuh ruh ba mat jong ka jingialang kadei ban iakren haba iadei bad ki kam kaba iadei bad ka jingthmu ban pynkynriah iaki nongdie madan na Khyndai Lad.
“Ka jingiakren ka la long kaba seisoh haba iadei bad ka mat ki nongdie madan. Mynta ki bor district ki lah ban iaid shakhmat ia ka kam kumba la shim ia ka rai” u la ong.
