Shillong, Jylliew 12: U Deputy Inspector General of Police (IGP) u DNR Marak u la ong ba ka jinglap ia u Mangalsutra, ka sati bad kiwei ki ksiar ka ai ksai iaki pulit ban thwet iaka Sonam Raghuvanshi kum ka ba donkti lang haka kam pyniap ia u lok jong ka u Raja Raghuvanshi.
Lah ban kdew ba ka jingngeit ki riewngeit Hindu ka long ba ka kynthei hadien bala iathoh, kam ju law ia u Mangalsutra na ryndang.
Haba kren shaki lad pathai khubor u DNR Marak u la ong ba ka jinglap ki pulit iaka metiap jong u Raja Raghuvanshi haka 2 tarik Jylliew bad iaka wait ba haka 3 tarik, kala pynlong shuh shuh iaki Pulit ban suba baka Sonam ka donkti lang ban pyniap iala u lok.
U Deputy IGP u la kubur baka Sonam kala phla ruh ba ka don bynta ban iasuh buit bad ka kynhun nongpyniap briew ban shim iaka jingim u Raja.
U la iathuh ruh ba ki Pulit kila sdang suba baka Sonam ka lah ban donkti lang ban pyniap iala u lok namar hadien ba la buddien iaki rynsan social media jong ki shikurim, ki pulit kim lap satia ba kin shondur ne ban post iaki dur jong ki arngut watla ki wan shangkai pyrthei (Honeymoon) sha Sohra.
