Shillong, Jylliew 12: Ka Synjuk ki Nongïalam Shnong Mawrong Road Ri-Bhoi District kala dawa na u Symbud Myntri Rangbah ka Jylla u Bah Prestone Tynsong ban kyntiew kyrdan ïaka Mawrong Sub-Centre shaka Primary Health Centre.
Ïaka Synjuk ki Nongïalam Shnong Mawrong Road Ri-bhoi District la ïalam da u MLA ka Mawhati u Bah Charles Marngar bad u la ïathuh baka Synjuk ka long kaba la kloi ban synniang ei ka jaka ban kyntiew kyrdan ïaka Mawrong Sub-Centre shaka Primary Health Centre.
Haba kren shaki lad pathai khubor u Bah Charles Marngar u la ong ba ka Mawrong Sub-Centre ka ai jingshakri ïa kumba 13 tylli ki shnong bad ka Umsning CHC ka jngai kumba 17 km na Mawrong. “Ka jingjngai ka shnong Mawrong na ka Umsning CHC ka buh jingeh ïaki paidbah khamtam ïaki longkmie ba armet ban ioh ki lad jingsumar namar kata la donkam ban kyntiew kyrdan ïaka Mawrong Sub-Centre shaka PHC” u la ong.
U MLA ka Mawhati u la ïathuh ba naka liang u Symbud Myntri Rangbah u la kular ban shimkhia ïa kane ka kam naka bynta ka bha ka miat ki paidbah nongshnong ka thain Mawrong.
