U Al-Waleed bin Khaled, khun jong u Khaled bin Talal, uba dei u Syiem ka ri Saudi Arabia, u la khlad noh na sla pyrthei hynnin ka 19 tarik bad, hadien ka jingiohthiah khlem kyndit briew la kumba 20 snem.
Kum ban shu kdew, ba u Al-Waleed bin Khaled, u la mad ia ka jingjia aksiden kaba shyrkhei, kaba la jia ha u snem 2005 ha ka por ba u dang dap 15 snem, ha ka por ba u dang pule ha UK bad naduh katei ka por, u khlem kyndit briew shuh, tad haduh ba u la khlad noh hynnin ka sngi ha ka rta kaba 36 snem.
Ia u Al-Waleed bin Khaled, la tip kum uta u khun Syiem ba thiah ne “Sleeping Prince” ha kaba naduh katei ka por ba u la kynduh ia katei ka jingjia aksiden ha UK, u khlem kyndit briew shuh, tad haduh ka sngi ba un khlad na sla pyrthei.
Ki tyllong khubor ki iathuh, ba ha katei ka jingjia aksiden, u Al-Waleed bin Khaled, u la shah ktah eh ha ki bynta ka jabieng bad kumjuh ruh ka jingmynsaw ha ki bynta ba shapoh, kaba la pynlong ia u ba um kyndit briew shuh bad khlem lah ban pynkoit ia u.
Hadien ka jingsumar ha UK, ia u Al-Waleed bin Khaled la rah noh sha King Abdulaziz Medical City kaba don ha Riyadh, ha kaba la sumar ia u da kaba pyndonkam lyngba ki Ventilator haduh 20 snem tad haduh ka sngi, ba un khlad noh ha sla pyrthei.
