Nongpoh, Naitung 19: Ka Seng Samla Catholic Block-C Umsning Parish, ha ka sngi Saitjaiñ ka la ïoh ban sdang ïa ka jingrakhe dap 25 snem ka jingïaid lynti naduh ba la seng ïa ka ha u snem 2001 bad ka ban sa dap 25 snem ha u bnai Naitung 2026.
Ïa katei ka jingsdang ban rakhe halor ka jingdap ba 25 snem ka Seng Samla Catholic Block-C Umsning Parish, la pynlong ha Madan Umsning Patarim, ha kaba la sakhi da ka jingwan shimbynta da u Bah A.L Hek, Myntri ka sorkar jylla kum u Kongsan, nangta u Bah Ioanis Syiemlieh, President ba nyngkong ka Seng Samla Catholic Block-C, u Bah Rocky Kylla, Chairman ka Umsning Town Dorbar, u Geraldo Syiemlieh, President ka Seng Samla Catholic Block-C lem bad kiwei.
Ha katei ka sngi ba sdang jong ka jingrakhe dap 25 snem, la ïoh ban pynher ïa ka lama jong ka Seng Samla Catholic Block-C da u Bah A.L Hek kum u kongsan bad hadien kata pat la don ka jingïalehkai phutbol paralok hapdeng ka Ri Bhoi Police pyrshah ïa ka Seng Samla Catholic Block-C, ha katei ka jingïakhun, ka Seng Samla Catholic Block-C ka la lah ban pynliem noh ïa ka Ri Bhoi Police ha ka jingïakhun kaba la poi sha ka jingïashut Tie Breaker.
Plie u Bah A.L Hek ha ka sngi sdang rakhe dap 25 snem ka Seng Samla Catholic Block-C
