Nongpoh, Naitung 19: Ban tehlakam ia ki Kali ba wan shalan ia ki dohkha ba dang im sha ka jylla Meghalaya khlem da iaid katkum ki kyndon jong ka aiñ, ka Hynniewtrep National Youth Front (HNYF), Northern Region mynta ka step ka la pynlong da ka jingtalasi ia ki Kali ba wan kit dohkha sha ka jylla ban pyrshah ba ki wan ban Khaïi dohkha khlem da don ki trading License.
Ia kane ka jingkhynra ia ki Trading License ia kito ki Kali ba wan ban pynpoi ia ki dohkha ba dang im na Assam sha Meghalaya la pynlong ha Byrnihat bad ha kane ka jingkhynra la lap ba da ki phew kali ki kali kit dohkha ba dang im ki la wan sha ka Meghalaya khlem da don ia ki kot ki sla bad khamtam ka Trading license.
Ka seng ka la lap ruh hadien ba la ioh bat ia bun tylli ki Kali kit dohkha ba dang im, la lap ba ym don ba long trai iwei ruh da u Khasi bad baroh ki dei jong ki bar jylla kiba ym don kot don sla bad ki la shu shim kyteng pat ha ka kyrteng ki Khasi tang ban ioh rung sha ka jylla ban pynhap ia kitei ki Dohkha ba dang im sha ka jaka ba ka thmu ban leit die.
Na ka liang ka seng ka la maham ruh ia ki bar jylla ba wan pynpoi dohkha sha ka jylla ki dei ban pynbiang ia ki kot ki sla ba donkam bad ha kajuh ka por ka seng HNYF ka dawa ruh na ka KHADC ba ka dei ban shim khia halor kine ki briew ba wan khaïi sha ka jylla khlem ki Trading License ha kaba kane ka ktah pat ia ki briew jong ka jylla.
