Nongpoh, Naitung 19: U MLA ka Nongpoh u Bah Mayral Born Syiem mynta ka sngi u la leit syndon ban ia kynduh ia ki samla ka Umling C&RD Block kiba leit pyntbit ha ka Chief Minister’s Career Guidance Scheme ba la pynlong ha Ri Bhoi Colelge bad kaba la ia trei lang bad ka bor synshar District k Ri Bhoi na ka bynta ban plie lad plie lynti ia ki samla kiba don mynsiem ban ia khun ia ki examination bapher bapher.
Kane ka jingleit kynduh u MLA ia ki samla markhmat, ka long ban twad jingmut na ki, haduh katno ki la ioh jingmyntoi na katei ka Carreer guidance, ba la pynlong khnang ha Ri Bhoi College na ka bynta ban pynshlur ia kito ki samla kiba don shisha ia ka mynsiem ban ia khun kam ha ki exam bapher.
Lyngba kane ka jingleit jurip jong u, ia katei ka jaka ai jinghikai ban pyntbit ia ki samla, u la ioh lad ban ia mir jingmut bad kiba bun ki samla bad u la ioh ruh ban pdiang ia shibun ki jingpynsngew ki samla na ka bynta ban dang pynjanai shuh shuh ia ka rukom ai jinghikai khnang ba kane ka jaka ai jinghikai kan long shisha ka jingmyntoi ia ki khun samla.
Haba kren ha kane ka sngi, u Bah Mayral Born Syiem, u la pynpaw ba ka daw kaba la pynong ia u ban leit jurip ne ia kynduh ia ki samla ba wan pyntbit ha kane ka prokram ai jinghikai, ka long ban tip kham bha haduh katno ki samla ki myntoi haba don kum kine ki jaka ai jinghikai.
U la kyntu ruh ia ki samla ba kim dei ban pynlehnohei bad ban pyndonkam hok ia kane ka lad ba la wan rah da u Myntri rangbah khnang ba lada ki leit ban ia khun kam ha kino kino ki exam kam kin poi sha kata ka thong kaba ki angnud, u la ong.
