Shillong. Jylliew 02: Wat hapdeng ka jingshitom bad ka jingsohsat ban sei ïaka met jong u Raja Raghuvanshi u nongjngohkai pyrthei na Indore u ba la jah bad la ka jong ka baieid haka thaiñ Sohra, ka kynhun jong ki pulit, haka jingdonlang ka kynhun SDRF, SOT bad West Jaintia Hills Adventure Mountaineering Club kila ioh ban sei noh ïaka met jong u Raja bad ïaka jingtohkit la pynlong da ka kong Adiel R Kyntan Executive Magistrate ka Sohra haka por 3;30 haduh 4 baje eiei janmiet.
Ki bahaiing jong u Raja kila ithuh ruh ïaka met lyngba ka tatoo haka kti kamon jong u kaba thoh Raja bad la lap ruh ïakawei ka sopti kynthei kaba rong lieh, u dawai kuli Pentra, ki bynta jong ka mobile phone Vivo bad ka smart watch na kti jong u.
Ia ka met jong u Raja la pynkit noh sha NEIGRIHMS naka bynta ka post mortem ban tip iaka daw tynrai jong ka jingiap naka liang ki pulit ki la register ruh da ka case shah pyniap bad la thaw ruh ïaka kynhun Special Investigation team ban tohkit halor katei ka jingjia.
Haduh mynta ïaka met jong ka kurim jong u Raja kaba la jah rngai lang naduh ka 23 tarik Jymmang ym pat shym la lapdien eiei, bad ka jingtohkit bad jingthwet ban lapdien sa iaka Sonam kaba dei ka kurim jong u Raja ka dang iaid shakhmat.
