Shillong, Jylliew 02: U Myntri Rangbah, u Conrad K Sangma, mynta ka sngi, u la leit ban kitbok kitrwiang ia ka kynhun ialehkai football ka jylla Meghalaya U-20 jong ki shynrang hashwa ba kin mih ban leit shimbynta ha ka jingshah hikai sha ka Elite Training Camp ha ka Olympique Lyonnais Training Academy, Lyon, France naduh ka 5 haduh ka 25 tarik Jylliew 2025.
Haba kren sha ka kynhun ki 28 ngut ki nongialehkai, u Myntri Rangbah, u Conrad K Sangma, u la ong ba ka Meghalaya ka don ka lad kaba khraw ha ka jingdon ki samla kiba dang khynnah bad ba ka sorkar ka pyrshang ban pyndonkam ia kane ka jinglong kaba donbor da kaban bei pisa ha ki prokram bapher bapher kiba phai sha ki samla.
“Haba ka jingthoh halor kane ka programme ai jinghikai ban pyntbit ia ki rangialehkai ka jylla, khlem da pynslem, nga la ai ka jingmynjur khlem jingartatien wat la ka jinglut baroh na ka bynta kane ka prokram ka long 2.80 Klur namar kane ka pisa kam dei ka jinglut hynrei ka jingpynmang ban sei ia ka sap ki samla,” u la ong.
Shuh shuh haba batai shaphang ka rukom pynmang pisa ban bei ha ki samla, u la bynrap, “Lada uno uno na phi u lah ban poi sha ka ISL ha ka lawei, phin lah ban pynphai pat ia ka jingpynmang jong ka sorkar kaba ngi la leh ha phi man uwei pa uwei ha kane ka prokram tang ha kawei ka season jong ka ISL, bad kumta nga iohi ba ka jingphah ia kane ka kynhun sha Lyon, France na ka bynta 20 sngi ka jinghikai kum ka jingbei ha ki samla bad ha ka lawei jong ka jylla Meghalaya.”
U Myntri Rangbah u la ong ruh ba ka jylla ha ki katto katne snem kan sa don kumba sanphew tylli ki madan phutbol artificial lem bad ka stadium phutbol kaba heh tam ha ka ri. “La ka dei ha ki nongtrei ba don jingstad ne ka jingpynbha ia ka jinglah jong ki nongialehkai ne ki jingdon jingeh kum ki stadium bad ki madan phutbol ne ka jingkyrshan ia ki club phutbol bad ki seng bapher bapher, baroh kine ki dei ki bynta jong ka jingthmu kaba kham heh kaba ngi don na ka bynta ka lawei jong ki samla bad ka jylla jong ngi,” u la ong.
Haba kren sha ki nongialehkai kiba hap ban shah jinghikai, u la kyntu ia ki ban shimkhia ia ka lad bad ban long kiba pynleit jingmut. “Man la ka por ba phi don ha ka jaka kilan, pynkynmaw ia lade shaphang kane ka lad kaba phi ioh, bad shim ia ka lad kaba rit tam ban nang, ban ioh jinghikai bad ban iasam, bad ban ioh mynsiem bad ban ioh jingpynshlur ban trei shitom na ka bynta kaba bha tam,” u la ong.
Kiwei pat kiba la donlang ki kynthup ia u Richard Yangtham, IAS, Joint Secretary, Sports and Youth Affairs, Saloni Verma, IAS, Executive Director, MBMA, Hamlet Dohling, President, Meghalaya Football Association, D.D Shira, Director Sports and Youth Affairs.
Ia kane ka kynhun na ka bynta ka training camp ha Lyon la lum bad thaw da ka jingiatrei lang jong ka Directorate of Sports bad ka Meghalaya Football Association, bad ka kynhun ka la shah jinghikai bniah ha ka SSA ground palat shi bnai, bad nalor kata, la thaw ruh ka kynhun kaba la ia shim bynta ruh ha ka U20 Nationals ha Chattisgarh ha kaba ka kynhun ka la ialehkai bha haduh ban da poi sha ka semi-finals ha kane ka kyrdan ialehkai ha ka sien kaba nyngkong.
Ia kane ka kynhun kan ialam da u Defender, u Rimankhraw Kharumnuid kum u Captain.
Kane ka jingioh jinghikai phutbol ha ka kyrdan pyrthei ha Lyon kaba la pyniaid da ka Indo French Sports Association kan wanrah jingiashem bad jingmyntoi da kaba pyni ia ki lad bapher bapher bad ki jingnang jingstad ha ka pyrthei jong ka phutbol bad shabar jong ka.
