Nongpoh, Jylliew 04: Namar ka jingbym phai khmat jong ka sorkar ban pynbit pynbiang ïaki jingdonkam ki skul bapher bapher, ka seng Federation of Khasi Jaintia and Garo People, Umling Circle mynta ka sngi kila leit ban aiti syndon da ki ben bad ki desk sha kawei ka skul sorkar bala tip kum ka Hynñiangbari Lum Government LP School kaba don haka shnong Ñiangbari Lum.
Ha katei ka sngi ka jingaiti ïa kitei ki ben la sakhi ruh da ka jingdonlang u Bah Luistar Lyngdoh President ka FKJGP North Khasi Hills District, Bah Banroy Wahlang President ka FKJGP Umling Circle lem bad ki dkhot, Bah Synrapbor Wahlang Chairman SMC, ka kong Banjop Syiem Headmistress lem bad ki kmie ki kpa bad ki khynnah skul.
Na ka liang u President ka FKJGP, North Khasi Hills District Unit, u Bah Lui Star Lyngdoh, haba kren ha kane ka sngi, u la ong ba ka daw kaba la pynlong ïa ka seng ban synñiang da ki Ben bad ki Desk ka dei ka jingsngewkhia ïa ki khynnah skul ba ka sorkar kam lah satia ban pynbiang ïa ki jingdonkam jongki bad kum ka seng ka angnud ruh ban kyntiew ïa ka pule ka puthi bad dei namar kane ka daw ka seng ka synñiang ïa ki Ben bad ki Desk kaba long shi bynta ka jingdonkam jong ki khynnah skul.
U la ong ruh ba ka seng kam lah ban shu sngap kyllut ki shkor haba wad ka jingud jingnam bad na ka bynta ka jingmyntoi ki khynnah skul da ka jingkylluid mynsiem ka shim ïa kane ka sienjam ban ïarap da ki Ben bad ki Desk khnang ba ki Khynnah skul kin ioh ban shong ha ki kamra Klas na ka bynta ban thoh ban tar ne ban pule.
Ha kajuh ka por, u la buh ruh ka jingkyrpad ïa ka sorkar ba kan phai khmat lem sha ki skul kiba don shibun ki jingduna khamtam kum ka skul sorkar ha ka jingshisha ka dei ban bit ban biang bad phewse ki bor pynïaid skul ki hap ban mad shibun ki jingeh na ka daw kiba bun ki jingduna ha ki skul.
Ha kane ka sngi, na ka liang u Bah Synrapbor Wahlang Chairman ka SMC bad ka kong Banjop Syiem kum ka Headmistress, ki la ai khublei kyrpang ïa ka seng FKJGP kiba la kloi ban ïarap lyngba ki Ben bad ki Desk sha kane ka skul, ba ki khynnah skul ki donkam shisha ïa kita ki Ben bad ki Desk bad ki khmih lynti ruh ba kane ka jingkylluid mynsiem ka seng kan ai jingmyntoi shibun ïa ki khynnah bad ruh ba ka seng kan dang bteng ban leh ïa kine ki kam bha na ka bynta ban kyntiew ïa ka pule ka puthi ki khynnah skul ha ka them Ri Bhoi bad ha ka jylla hi baroh kawei.
