Nongpoh, Naitung 16: Ka la pynkmen eh ia ki paid khappud kiba shong ha ki shnong bapher bapher jong ka thaiñ Rani Bari bad kata ka dei hadien ba mynta ka sngi, u Bah Sosthenes Sohtun, MLA Jirang, u la leit ban plie paidbah ia ka Rani Bari Sub Centre, kaba don hapoh ka shnong Rani Bari, kaba dei ka shnong kaba hap ha Jirang Block. Ia kane ka Sub Centre yn sa pyniaid ne ban peit da ka Carona Trust.
Katei ka Rani Bari Sub Centre, kan sa ai jingmyntoi ia ki paidbah ha ki 12 tylli ki shnong khappud kiba don ha ka thaiñ Rani Bari, namar lyngba katei ka Sub Centre, ki paidbah kiba shong ha katei ka thain, kin suk haba ki leit shah sumar ha ka por ba ki pang ki shitom bad ba ki la leit ban leit shah sumar shaduh Warmawsaw ne shaduh Patharkhmah bad ruh ban leit shah sumar ha ki jaka sumar kiba don ha ka liang Assam.
Haba plie ia katei ka Sub Centre, la sakhi ruh da ka jingdon ka Kong B. Ranee, ADC Ri Bhoi, kum ka Symbud Kongsan, A.R Marak, DMHO Ri Bhoi, ka Dr. K. Lyngdoh, Medical Office ka Patharkhmah CHC, ki heh na ka Carona Trust, ki Rangbah Shnong ka thain Rani Bari lem bad ki paidbah nongshong shnong ka thain Rani Bari hi baroh kawei.
Haba kren ha katei ka jingplie ia katei ka Sub Centre, u Bah Sosthenes Sohtun, u la ong ba u kmen eh ba u la ïoh ban pynurlong ia katei ka jingangnud kaba la slem, namar ia katei ka Sub Centre ka dei kaba u la angnud naduh ka por ba u iakhun ha ka ilekshon 2018, ha kaba u la kular hakhmat ki paidbah jong katei ka thain, ba lada kin pynjop ia u kum u MLA, un sa pynioh beit ia kawei ka Sub Centre hapoh katei ka thain.
Shuh shuh, u la ong ruh ba um lah khlem da ai jingiaroh ia ka Sorkar bad khamtam eh ia u Conrad K. Sangma, namar ha ka jinglong nongialam jong u ia ka jylla, ka la lah ban wanrah shibun ki kam pynroi bad kaba la long shisha kaba ai myntoi ia ki paidbah hapoh ka jylla hi baroh kawei bad khamtam eh ia ka Jirang Constituency.
Haba pynkut ia ka jingkren, u Bah Sosthenes Sohtun, u la ong ruh ba u kmen eh ba u la lah ban pynieng ia katei ka Sub Centre ha khappud eh bad ka Assam bad kaba la kylla long kum kawei na ki sakhi kaba shai eh bad ka ban pynpaw ba katei ka jaka ka dei hapoh ka Meghalaya.
