Shillong, Jylliew 10: U Bah Titostarwell Chyne, MDC ka Sohra, haba kren ha ka jingïalang paidbah mynta ka sngi ha Saitsohpen Sohra, u la dawa ïa kito ki briew kiba la kynthoh bad pynjah burom ïa ka Sohra bad kaba la ktah eh ïa ki Nong Sohra, ba ki dei ban panmab noh mardor kata hapoh ka 24 kynta, lym kumta kim sa ngat ha ka jingshah ujor Ejahar bad ka ka Ain kan sa leh pyrshah ïa kito kiba la don bynta ban kynthoh.
Ha ka jingkren jong u Bah Titostarwell Chyne, u la ong ruh ba ha kane ka jingjia ba shah pynïap u Raja Raghuwanshi ha kawei ka khlaw ha Weisawdong, la don ruh ki briew na kane ka jylla kiba dei ki Khasi, ki la kynthoh da ki kyntien kiba tohmet bha ïa ka Sohra, kiba la pynmih ruh da kita ki kyntien ‘Men Shohnoh’ bad kaba la ktah eh ïa ki paidbah kiba don ha ka thaiñ Sohra hi baroh kawei.
Nalor ba ka Sohra, ka la mad ïa kata ka jingshah kynthoh khlem nongrim naduh ha ki Lad pathaikhubor na ri thor bad ruh na kiba haiing u Raja Raghuwanshi bad Sonam Raghuwanshi, hynrei kaba la pynktah eh ïa ki Nong Sohra, ka dei ba wat ki paradoh para snam ruh ki kynthoh khlem nongrim ïa ka Sohra.
Kumta, halor kane, na bynta jong kito ki nongkynthoh, ba ki dei ban panmap hapoh ka 24 kynta, lym kumta bad lada kim panmab, kin sa shah ai Ejahar, namar kumba ka long mynta, ki don shibun ki briew kiba ngi la tip bad kiba la donkti ha ka kam ban kynthoh ne kren bein ïa ka Sohra.
