Nongpoh, Jylliew 10: Ki kam ba la leh arsap da u Raj Kuswaha, ba la kynnoh uwei na uba la don kti ban pyniap ia u Raja Raghuvanshi ha jan Wei Sawdong ha Sohra bad uba la kynnoh ruh ba u don jingiadei bad ka Sonam Raghuvanshi ka la paw pyrthei lyngba ki dur khih, namar ha ka por ba um pat shym la shah kem ha ki Pulit u la leh arsap kum uba bha eh ban pyntngen ia u kpa ka Sonam Raghuvanshi hadien ba la poi ka metiap u Raja sha Indore.
Ia kine ki kam leh arsap u Raj Kuswaha la sakhi lyngba ki dur khih, kiba u la leh mynleh kum uba bha eh ban pyntngen ia u kpa ka Sonam Raghuvanshi, u Devi Singh Raghuvanshi, ha ka por ba la wan poi ka metiap u Raja ha Indore.
Na katei ka dur khih, khlem don jingsngew u Raj Kuswaha u la btin lynti ia u kpa ka Sonam uba don hapdeng ka jingsngewsih bad la jin ba ki pulit ki ioh kem ia u, kane ka kam arsap utei u runar kan nym paw pyrthei.
Kum ban pynkynmaw, ia ka metiap u Raja Raghuvanshi la lap ha ka 2 tarik u Jylliew 2025 najan ka Wei Sawdong ha Sohra bad hadien ka jingtohkit bad ba la pyndep ia ka postmortem ha NERIGRIMHS la rah noh ia ka met u Raja Raghuvanshi sha Indore bad dei hangne la paw kitei ki kam arsap utei u Raj Kuswha uba la shu leh mynleh kum uba hok eh ban pyntngen ia u kpa ka Sonam bad ruh ban pynkreh pynkrum ruh ha kaba leh burom khatduh ia ka met u Raja Raghuvanshi bad kaei kaba la paw shabar ba u dei uba arsap ka dei hadien la kem noh ia u da ki Pulit ba la la kynnoh ba u don kti ha kaba pyniap ia u Raja Raghuvanshi lem bad kiwei pat ki 3 ngut ki paralok jong u, kiba la shah kem ha ki pulit ka Madhya Pradesh bad Uttar Pradesh.
Nalor ka sonam Raghuvanshi ba la kynnoh ba la ia suhbuit ban pyniap ia u Raja Raghuvanshi, ki 3 ngut pat kiba la shah kem ki kynthup ia u Vishal Chauhan, u Akash Rajput bad u Anand Kurmi ba la ioh kem khatduh da ki Pulit ka Madhya Pradesh ba la kynnoh halor ka jingdon kti ban pyniap ia u Raja Raghuvanshi.
Kumba la sakhi ruh na kane ka dur khih, wat u kpa jong ka Sonam u Devi Singh Raghuvanshi, u la leh arsap namar da lade u la kren ba um tip ei ei shaphang u Raj Kusawaha, bad katba ha katei ka dur khih dei u Raj Kuswaha uba ialam ia u ha ka por ba poi ka met u Raja Raghuvanshi sha Indore.
