Nongpoh, Risaw 16: Ka da long shisha ka jingkmen kaba khraw ia ki 2 tylli ki Longïing baduk hapoh ka Mawhati Constituency kiba hapdeng ka jingban jong ka jingduk, hynrei da ka jingsbun mynsiem u Bah Charles Marngar kum u MLA ka thaiñ ki la ioh syndon da ka ïing shong kaba paka, kaba la tei bad pynlut hi da ka tulop MLA jong u kum kawei na ka jingai sngewbha sha ki baduk.
Kine ki 2 tylli ki longïing baduk ba la pynshna ïing da u MLA ki kynthup ia ka ïing jong ka Kong Medalin Lamare ha ka shnong Nongjri Ummawbuh bad kawei pat ka dei ka ïing jong ka Kong Banriburom Kharkongor ha ka Shnong Sohpdok.
Kine ki 2 tylli ki longïing ba la jied da u MLA ki dei shisha ki longïing kiba donkam ia ka jingiarap ha kaba ha Nongjri Ummawbuh ka Kong Medalin Lamare kaba dei u kurim jong u Bah B. Shylla ki don 6 ngut ki khun bad ha Sohpdok ka Kong Banriburom Kharkongor kaba dei u kurm jong u Bah A. Kurkalang ki don 3 ngut ki khun bad baroh ar tylli ki longïing ki mad jingeh shisha ban shan ia ki ïing kiba paka na ba ban ka jingduk bad kane ka jingsbun mynsiem u Bah Charles Marngar kum u MLA ka la long shisha ka jingkhu ia ka ïng ka sem jong ki ban ioh da ka ïing kaba la bit la biang.
Kaei kaba la pynlung mynsiem shuh shuh ia kine ki longïing, ka dei ruh hadien ba mynta ka sngi u MLA u la leit ban plie bad aiti ia kitei ki ïing sha kitei ki 2 tyll ki longïing kum ka jinglehkmen bad hapdeng ka jinglehkmen kum ummat jong ka jingkmen ki tuid ha ki ngap jong kitei ki kmie ki kpa kiba la ioh pdiang ia kane ka jingkyrkhu da ka jingsbun mynsiem u MLA.
Kumba la ai jingkren ha kane ka sngi ba la lehkmen ban plie ia kitei ki ïng, u Bah Charles Marngar u la ong ba ka thong jong ka jingim jong u, ka dei ka jingkmen ban ioh iarap ia ki baduk ba kyrduh bad u la shim ia kane ka rai ban shna ia kitei ki ïing da kaba pynlut da ka tulop MLA ka dei namar ba u don kata ka jingsngewkhia ban iohi ba ka jingduk jingkyrduh ka ban ha kitei ki longïing bad da kaba lah ban shna ia kine ki ïing ka la long shisha ka jingkyrkhu ia kine ki longing.
