Shillong, Rymphang 13: Na ka jingsuba ba lah ban don ki nongwei ne ki bar ri ba long beain ha ka jingpynrung kyrteng ha ka thup jong ka Electoral Roll, ka Hynniewtrep Integrated Territorial Organisation (HITO) ka la kyrpad syndon da na Chief Electoral Officer u Dr BDR Tiwari ban peit bniah biang ia kane ka jingpynrung kyrteng lyngba katei ka thup ba la pynrung kyrteng ban ioh thep vote.
Ha ka shithi ba la phah mynta ka sngi sha u Chief Electoral Officer, U President ka HITO u Bah Donbok Dkhar u la wan rah ka jingujor (Petitioin) jong u (L) Prof. M.N Majaw ha u snem1985 ba donkam ban pyntreikam da ka Memorandum of Settlement Accord’s Principles ban tehlakam halor kane ka phang ban lait na ka jingpynrung kyrteng klumar ia ki briew kiba ym dei hok ban ioh thep vote.
Haba ai jingmut sha Chief Electoral Officer, ka HITO ka la kyrpad jur ban shim da ki lad kiba pyrkhing bha ban iada ne ban lait na ka jingpynrung kyrteng klumar ha ka electoral roll ia ki briew kiba ym dei hok ban pynrung kyteng ha ka electoral roll.
Kine ki jingai jingmut ka HITO, ki kynthup ban bishar bniah ia ki kot ki sla haba ki wan ban pynrung kyrteng bad ban nym pdiang ia ka Aadhar Card na ka bynta ban ioh pynrung kyteng ha ka electoral roll.
Ka HITO ka la ai jingmut ruh ban pdiang ia ka jingpynshisha lyngba ki kot ki slab a ai da ki Dorbar Shnong, Syiem, Nokma bad ruh ki jingpynshisha da ki kur ki jaid halor ka jaka shong jaka sah jong ki.
Ka HItO ka la kyrpad ruh ban pyntreikam da kata ka Cut-off year jong u snem 1985 Memorandum ka Settelment Accord ban iada kyrpang ia ka jinglong tynrai hapoh ka jylla.
Ka HITO lyngba u President ka la kyrpad ruh ban thung da kata ka principles of the Accord na ka bynta ban iada bad pynneh ia ka jingriewsphah ka jylla ha jinglong tynrai, ka ktien, bad ka rukom long ka rukom man tynrai ki Khasi, Jaintia bad Garo. Ka seng ka kyrpad ba kane ka jingai jingmut kan long kaba tei bad kaba ioh jingmyntoi na ka bynta pyrtreikam janai ha ka jingpynrung kyrteng ha ka thup jong ka Electoral Roll.
Haba pynpaw ruh halor ki jinglong jingman jong ki jaka kiba buh jingma ia ka jylla, ka HITO ka la pynpaw ba ka jylla Meghalaya ka don ha syndah ka thain khpapud ka India bad Bangladesh kaba jngai tang kumba 443 KM bad kane ka buh jingma bha ia ka jingwan rung tuh ki Nong Bangladesh kiba lah ban shim kabu ha kaba pynrung kyteng ha ka electoral roll na ka bynta ban ioh thep vote ha kane ka jylla.
Shuh shuh, ka HITO ka la pynpaw ruh ba ka jingioh ka Meghalaya la ka jong ka jylla ha u snem 1972 kam da dei than tang ban ioh bor ha ka kam sain hima sima, hynrei ka dei ka jingiaid lynti ba la donkam ban don ka jingiada kaba kyrpang ia ka hok ki trai muluk ki trai jylla bad ia ka jinglong tynrai ba kyrpang jong ki trai muluk ki trai jaka ha kane ka jylla.
