Shillong, Nailar 05: Haba pdiang burom mynta ka sngi ha Nongbah Shillong ia u Bah Ronie Lyngdoh, MLA ka Congress uba la wan ban pyniasoh dang shen ha kine ki sngi sha ka Party NPP, u Myntri Rangbah ka jylla, u Conrad K. Sangma u la ong ba ka Party NPP ka pdiang ia ki 4 ngut ki MLA ka Congress kynthup ia u Bah Ronie Lyngdoh, ka dei namar ba kim shym la buh kano kano ka kyndon ne ka jingdawa, hynrei ki wan sha ka party NPP ka dei na ka bynta ki kam pynroi jong ki paidbah ka Constituency.
U la ong ruh ba ka party NPP ka kloi ban pdiang ym tang ia ki MLA bad wat ki nongialam, namar ka party ka angnud ban don ka jingiatrei lang na ka bynta ki jingmyntoi jong ki paidbah ba kum ka Party NPP ka ieng ha ka nongrim ban shakri bad ban ai ia ki kam pynroi sha u paidbah.
“Naduh ba la sdang ka jingiakren shwa ba kin wan sha ka NPP, la dep ia kren shai ba ka party NPP kan nym lah ban ai jingmyntoi shimet ia ki, hynrei ka party ka kloi ban phai khmat pat ia ka jingdonkam ki paidbah hapoh ki constituency” ong u myntri rangbah bad bynrap ruh ba ka party NPP ka don ia kata ka thong ban pynkhlain ia ka party kum ka thong ban wan rah shibun ki kam pynroi na ka bynta ka jingdonkam u paidbah bad ym na ka bynta ka jingmyntoi ki MLA ne ki nongialam” u la bynrap.
Ha kane ka sngi, ba la leh burom ia u Bah Ronnie Lyngdoh, MLA ka Mylliem la sakhi lang ruh da ka jingdon lang ki ar ngut ki Symbut Myntri ka sorkar, u Bah Prestone Tynsong bad u Bah Sniawbhalang Dhar lem bad kiwei kiwei ki MLA bad ki heh Nongialam ka NPP.
Kum ban pynkynmaw, ki saw ngut ki MLA ka Congress kiba la wan ban pyniasoh sha ka party NPP ki kynthup ia u Dr. Celestine Lyngdoh, MLA ka Umsning, u Bah Gabriel Wahlang MLA Nongstoin, u Bah Charles Marngar, MLA ka Mawhati bad kynthup ia u Bah Ronie V. Lyngdoh MLA ka Mylliem uba la wan ban pyniasoh dang shen bad ba la pdiang burom ia u mynta ka sngi da u National President ka NPP bad u Myntri rangbah ka jylla u Conrad K. Sangma.
