Shillong, Nailar 06: Ka kynhun Shillong Roadside Hawkers’ Association (SRHA) hynne ka sngi kala pynpaw ka jingsngewhun iaka jingialang bala khot da u CEO ka Shillong Municipal Board (SMB) u PK Boro.
Ia kane ka jingialang jong ka Provisional Town Vending Committee (PVTC) ka SMB, ka dei kaba la khot na ka bynta ka bha ka miat jong ki nongdie madan ha kylleng ka sor Shillong.
Ha kane ka jingialang la don lang ki dkhot ka Meghalaya and Greater Shillong Progressive Hawkers and Street Vendors Association (MGSPHSVA) bad ka Shillong Roadside Hawkers’ Association (SRHA) bad ka Khasi Student Union (KSU).
Haba kren sha ki lad pathai khubor hadien ka jingialang ka President jong ka SRHA ka Kong T Nongbri ka la pynpaw ia ka jingsngew tynnad halor kane ka jingialang bala khot da u CEO ka SMB.
Ka Kong Nongbri kala iathuh ba naka liang u CEO ula pynthikna ban khot biang ia ka jingialang khnang ban iakren sani halor ka jingthmu ban pynkynriah lut ia baroh ki ba shong die jingdie madan haki surok bad rud surok ka nongbah Shillong.
Naka liang u Bah E Chen uba dei u Dkhot ka PTVC u la iathuh ba ka rai ba mih na kane ka jingiakynduh lang ka dei ban long kaba ia bit ia biang lang jong baroh ki nongdie madan ha sor Shillong.
U Bah Chen ula iathuh ruh ba kito ki bym pat ioh ia ka COV kin dang iai iakren bad na ka liang u CEO ka SMB un sa khot biang ia ka jingialang jong ka PTVC ha kine ki sngi ban wan.
